କାହିଁକି ଘଟିଲା ମଣିପୁରର ନିନ୍ଦନୀୟ ଘଟଣା?

ମଣିପୁର (ବଡ଼ ଖବର ବ୍ୟୁରୋ): ମଣିପୁରକୁ ନେଇ ସାରା ଦେଶ ସ୍ତବ୍ଧ । ଚାରିଆଡେ ସୃଷ୍ଟି ହୋଇଛି ଆଲୋଡ଼ନ । ବୁଧବାର ଦୁଇ କୁକି ମହିଳାଙ୍କୁ ନିବସ୍ତ୍ର କରି ରାସ୍ତାରେ ଚଳାଇବା ତଥା ଯୌନ ନିର୍ଯାତନା ଦେବା ପ୍ରସଙ୍ଗରେ ଉଠୁଛି ପଡୁଛି ରାଜରାସ୍ତା । ସରଗରମ ଗୃହ । ତେବେ କିପରି ଥିଲା ଏହି ଘଟଣା? କାହିଁକି ଘଟିଲା ଏପରି ଲଜ୍ଜାଜନକ ଚିତ୍ର? ଏହି ଘଟଣାରେ ସାରା ଦେଶର ମୁଣ୍ଡ ନଇଁ ଯାଇଥିବା ବେଳେ ଆଶ୍ଚର୍ଯ୍ୟଜନକ କଥା ସାମ୍ନାକୁ ଆସିଛି । ତେବେ ଅସଲ ଘଟଣା ଫେକ ଫୋଟୋରୁ ଆରମ୍ଭ ହୋଇଥିଲା । ଯାହାକୁ କେନ୍ଦ୍ର କରି ଉପୁଜିଥିଲା ବିବାଦ । ଘଟଣା ପୂର୍ବରୁ ଭାଇରାଲ ହୋଇଥିଲା ଏକ ଫେକ ଫଟୋ । ଯେଉଁଥିରେ ଉତ୍ତେଜିତ ହୋଇଥିଲେ ମାଓବାଦୀ । ଫଟୋ ଟି ଦର୍ଶାଉଥିଲା ଯେ ରାଜ୍ୟର ଚୁରାଚାନ୍ଦପୁରରେ କୁକି ପୁରୁଷଙ୍କ ଦ୍ୱାରା ବଳାକôାର ଓ ପରେ ହତ୍ୟା କରାଯାଇଥିଲା । କିଛି ସମୟ ମଧ୍ୟରେ ଭାଇରାଲ ହୋଇଯାଇଥିଲା ଏହି ଫେକ ନୁ୍ୟଜ । ଯାହାର ପ୍ରତିଶୋଧର ଶୀକାର ହୋଇଥିଲେ ଦୁଇ କୁକି ମହିଳା । ପରବର୍ତ୍ତୀ ସମୟରେ ଫଟୋରେ ଥିବା ଯୁବତୀଙ୍କର ପରିଚୟ ସାମ୍ନାକୁ ଆସିଲା । ସେ ଥିଲେ ଦିଲ୍ଲୀର ଆୟୁଷୀ ଚୌଧୁରୀ । ଯିଏ ନଭେମ୍ବର ୨୦୨୨ରେ ତାଙ୍କ ମା-ବାପାଙ୍କ ଦ୍ୱାରା ହତ୍ୟାର ଶୀକାର ହୋଇଥିଲେ । ତେବେ ଯେତେବେଳକୁ ଏହି ଖବରର ସତ୍ୟାସତ୍ୟ ସାମ୍ନାକୁ ଆସିଲା ସେତେବେଳକୁ ଦୁଇ ମହିଳାଙ୍କ ଇଜ୍ଜତ ହାଟରେ ପଡ଼ି ଦାଣ୍ଡରେ ଗଡ଼ିସାରିଥିଲା । ସାମ୍ନାକୁ ଆସିଲା ଏଭଳି ଏକ ଲଜ୍ଜାଜନକ ଘଟଣା । ଯେଉଁଠି ଭାରତକୁ ମା’ ବୋଲି ଆଖ୍ୟା ଦିଆଯାଉଛି ସେଠି ରାସ୍ତାରେ ଦୁଇ ମହିଳାଙ୍କ ଇଜ୍ଜତ ନିଲାମ କରାଗଲା । ଏଭଳି ଘୃଣ୍ୟ କାର୍ଯ୍ୟକୁ ନିନ୍ଦା କରୁଛନ୍ତି ଦେଶବାସୀ ।