ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଗୁଜରାଟ ମୁଖ୍ୟମନ୍ତ୍ରୀ ବିଜୟ ରୂପାନିଙ୍କ ହଠାତ ଇସ୍ତଫା ପରେ ସାରା ଦେଶର ରାଜନୈତିକ ମାହୋଲ ସରଗରମ ହୋଇ ଉଠିଥିଲା । ବର୍ତ୍ତମାନ ଗୁଜରାଟର ନୂତନ ମୁଖ୍ୟମନ୍ତ୍ରୀ କିଏ ହେବ, ସେନେଇ ଅନେକ କଳ୍ପନାଜଳ୍ପନା ଚାଲିଛି । ଏହା ମଧ୍ୟରେ ନୂତନ ମୁଖ୍ୟମନ୍ତ୍ରୀ ବାଛିବା ପାଇଁ ଆଜି ଅପରାହ୍ନ ତିନିଟାରେ ବିଜେପି ବିଧାନସଭା ଦଳର ଏକ ବୈଠକ ହେବ ବୋଲି ସୂଚନା ମିଳିଛି । ଏହା ସହ କେନ୍ଦ୍ର କୃଷିମନ୍ତ୍ରୀ ନରେନ୍ଦ୍ର ସିଂହ ତୋମାର ଏବଂ କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ ପ୍ରହଲ୍ଲାଦ ଯୋଶୀଙ୍କୁ ଦଳ ପକ୍ଷରୁ ପର୍ଯ୍ୟବେକ୍ଷକ କରାଯାଇଛି ।
ଅପରପକ୍ଷରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅତି ନିକଟତର କୁହାଯାଉଥିବା ପ୍ରଫୁଲ ଖୋଦା ପଟେଲ ନୂତନ ମୁଖ୍ୟମନ୍ତ୍ରୀ ହେବେ ବୋଲି ଚର୍ଚ୍ଚା ଜୋର ଧରିଛି । କେବଳ ପ୍ରଫୁଲ ଖୋଦା ପଟେଲ ନୁହଁନ୍ତି ବରଂ କେନ୍ଦ୍ରମନ୍ତ୍ରୀ ପୁରୁଷୋତ୍ତମ ଭୋଇ ରୂପାଲାଙ୍କ ଚର୍ଚ୍ଚା ମଧ୍ୟ ମୁଖ୍ୟମନ୍ତ୍ରୀ ପଦ ପାଇଁ କିଛି କମ ନୁହଁ । ଅନ୍ୟପଟେ ବିଜୟ ରୂପାନି କେନ୍ଦ୍ରର ନିର୍ଦ୍ଦେଶକ୍ରମେ ନିଜ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିବାର କଥା ସାମ୍ନାକୁ ଆସୁଛି । କାହିଁକିନା ଗୁଜୁରାଟରେ ଆସନ୍ତା ବର୍ଷ ହେବାକୁ ଥିବା ବିଧାନସଭା ନିର୍ବାଚନ ପାଇଁ ବିଜେପି ଶକ୍ତିଶାଳୀ ପଟେଲ ସମ୍ପ୍ରଦାୟକୁ ଖୁସି କରିବା ପାଇଁ ଏପରି କରୁଥିବାର ଅନୁମାନ କରାଯାଉଛି । ରୂପାନିଙ୍କ ଇସ୍ତଫା ପରେ ବର୍ତ୍ତମାନ ଗୁଜରାଟର ପରବର୍ତ୍ତୀ ମୁଖ୍ୟମନ୍ତ୍ରୀ କିଏ ହେବ ? ଏନେଇ ଚର୍ଚ୍ଚା ଆରମ୍ଭ ହୋଇଥିବାର ଦେଖିବାକୁ ମିଳିଛି ।
ତେବେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭୀୟଙ୍କ ନାମ ମୁଖ୍ୟମନ୍ତ୍ରୀ ପଦ ସମସ୍ତଙ୍କ ଠାରୁ ଅଧିକ ଚର୍ଚ୍ଚାରେ ରହିଛି । ତାଙ୍କ ସହ ଗୁଜୁରାଟର ଉପମୁଖ୍ୟମନ୍ତ୍ରୀ ନୀତୀନ ପଟେଲଙ୍କ ନାମ ମଧ୍ୟ ମୁଖ୍ୟମନ୍ତ୍ରୀ ପଦ ଦୌଡ଼ରେ ରହିଛି । ଅପରପକ୍ଷରେ ମୁଖ୍ୟମନ୍ତ୍ରୀ ପଦ ପାଇଁ ନୀତୀନ ପଟେଲଙ୍କ ନାମ ସବୁଠାରୁ ଆଗରେ ରହିଛି । ଯେହେତୁ ପଟେଲ ପାଟଦାର ସମ୍ପ୍ରଦାୟ ଅନ୍ତର୍ଭୁକ୍ତ । ତେଣୁ ତାଙ୍କ ନାମ ମଧ୍ୟ ମୁଖ୍ୟମନ୍ତ୍ରୀ ପଦ ଦୌଡ଼ରେ ଆଗରେ ରହିଛି । କାରଣ ରାଜ୍ୟରେ ଏହି ସମ୍ପ୍ରଦାୟର ବେଶ ଦବଦବା ଥିବାର ଦେଖିବାକୁ ମିଳିଥାଏ । ସେହିପରି ପୁରୁଷୋତ୍ତମ ରୁପାଲା ରାଜ୍ୟର ଜଣେ ବରିଷ୍ଠ ନେତା । ଉଭୟ ରୂପାଲା ଓ ମାଣ୍ଡଭୀୟ କେନ୍ଦ୍ର ମନ୍ତ୍ରୀମଣ୍ଡଳରେ ଅଛନ୍ତି । ତେଣୁ ନୂ୍ତନ ମୁଖ୍ୟମନ୍ତ୍ରୀ ପଦ ପାଇଁ ଉକ୍ତ ନାମ ମଧ୍ୟରୁ ଅନେକ ଯୋଗ୍ୟ । ହେଲେ ଦଳ କାହାକୁ ନୂତନ ମୁଖ୍ୟମନ୍ତ୍ରୀ ପଦ ପାଇଁ ବିବେଚିତ କରୁଛି ତାହା ଦେଖିବାର ବିଷୟ ।
