ଗୁଇନ୍ଦା ରିପୋର୍ଟ ପରେ ବି କାହିଁକି ହିଂସା ରୋକିପାରିଲାନି ପୋଲିସ

ସମ୍ବଲପୁର (ବଡ଼ ଖବର ବ୍ୟୁରୋ):  ସମ୍ବଲପୁର ହିଂସାକୁ ନେଇ କାଠଗଡ଼ାରେ ପୋଲିସ । ହିଂସା ରୋକିବାର ସୂଚନା ପାଇ ବି ଫେଲ୍ ମାରିଛି ପୋଲିସ । ଗୁଇନ୍ଦା ରିପୋର୍ଟ ସାମ୍ନାକୁ ଆସିବା ପରେ ସରକାରଙ୍କୁ ଘେରିଛନ୍ତି ବିରୋଧୀ । ସମ୍ବାଲପୁରରେ ଜାଣିଶୁଣି ପୋଲିସ ହିଂସା କରିବାକୁ ଦେଲା ବୋଲି ସଂଗୀନ ଆରୋପ ଲଗାଇଛନ୍ତି । ବିଜେପି ସାଂସଦ ଅପରାଜିତା ଷଡ଼ଙ୍ଗୀ କହିଛନ୍ତି, ବିରୋଧୀଙ୍କ କଥାକୁ ସରକାର କର୍ଣ୍ଣପାତ ନ କରିପାରନ୍ତି । କିନ୍ତୁ ସାଧାରଣ ଲୋକଙ୍କ ବ୍ୟାବସ୍ଥା ଉପରୁ ଆସ୍ଥା ଉଠିଗଲାଣି । ସରକାର ଅନ୍ତତଃ ଏହାକୁ ନେଇ ଭୟ କରିବା ଉଚିତ୍ । ପୋଲିସ ନିକଟରେ ଆଗୁଆ ସୂଚନା ଥିଲା ସମ୍ବଲପୁରରେ ହିଂସା ଆଶଙ୍କା ରହିଛି ।

ହେଲେ କାହିଁକି ଏହାକୁ ରୋକିବାକୁ ପଦକ୍ଷେପ ନିଆଗଲାନାହିଁ, ହିଂସା ହେବାକୁ ଦିଆଗଲା ବୋଲି ସେ ପ୍ରଶ୍ନ କରିଛନ୍ତି । କଂଗ୍ରେସ ମଧ୍ୟ ରାଜ୍ୟ ସରକାରଙ୍କୁ ସମାଲୋଚନା କରିଛି । ପୋଲିସର ଭୂମିକା ସନ୍ଦେହଜନ ବୋଲି କହିଛନ୍ତି ଦଳର ମୁଖପାତ୍ର ନିଶିକାନ୍ତ ମିଶ୍ର । ଗୁଇନ୍ଦା ରିପୋର୍ଟ ସାମ୍ନାକୁ ଆସିବା ପରେ ରାଜ୍ୟ ସରକାର ବ୍ୟାକଫୁଟରେ । ପୋଲିସ ଜାଣିଶୁଣି ହିଂସା କରିବାକୁ ଦେଲା ବୋଲି ବିରୋଧୀଙ୍କ ଅଭିଯୋଗରେ ଶାସକ ଦଳ ସଦସ୍ୟ ଉତ୍ତର ଦେବା ବଦଳରେ ପୋଲିସ କୋର୍ଟକୁ ବଲ୍ ଫିଙ୍ଗି ଦେଇଛନ୍ତି । ବିଜେଡି ବିଧାୟକ ଶଶୀଭୂଷଣ ବେହେରା କହିଛନ୍ତି, ଏଭଳି ଅଭିଯୋଗର ଉତ୍ତର ସେ ନୁହେଁ ବରଂ ପୋଲିସ ଦେଇପାରିବ ।