ରୋଗୀଙ୍କୁ ଭୁଲ ସାଲାଇନ, ପରିବାର ଭୟଭୀତ
ବଲାଙ୍ଗିର (ବଡ଼ ଖବର ବ୍ୟୁରୋ): ପୁଣି ଚର୍ଚ୍ଚାରେ ବଲାଙ୍ଗିର ଭୀମଭୋଇ ମେଡିକାଲ। ମେଡିସିନ ୱାର୍ଡରେ ଜଣେ ରୋଗୀକୁ ଭୁଲ ସାଲାଇନ୍ ଦିଆଯାଇଛି । ୪୮ ନମ୍ବର ବେଡର ଖେଡୁ ସାମଲକୁ ୪୯ ନମ୍ୱର୍ ବେଡର ରୋଗୀ ହରି ମହାନନ୍ଦଙ୍କ ସାଲାଇନ ଦିଆଯାଇଛି। ଖେଡୁ ପେଟ ବ୍ୟଥା ପାଇଁ ମେଡିକାଲରେ ଭର୍ତ୍ତି ହୋଇଥିବାବେଳେ ହରି କିଡନୀ ରୋଗରେ ଆକ୍ରାନ୍ତ। ଜଣେ କିଡନୀ ରୋଗୀର ସାଲାଇନ ଦିଆଯାଇଥିବାରୁ ଖେଡୁର ପରିବାର ଲୋକେ ଭୟଭୀତ ହୋଇ ପଡିଛନ୍ତି।
କାଳେ ପାର୍ଶ୍ଵ ପ୍ରତିକ୍ରିୟାରେ କ’ଣ ହୋଇଯିବ ସେନେଇ ଚିନ୍ତାରେ ପରିବାର। ହେଲେ ନର୍ସର ଖାମଖିଆଲି ମନୋଭାବ ଯୋଗୁଁ ଏଭଳି ଘଟଣା ଘଟୁଛି। ସାଲାଇନରେ ହରି ମହାନନ୍ଦଙ୍କ ନାମ ଲେଖା ହୋଇଥିବାବେଳେ କେମିତି ସେହି ସାଲାଇନ ଖେଡୁକୁ ଦିଆଗଲା ତାହା ପ୍ରଶ୍ନବାଚୀ ସୃଷ୍ଟି କରିଛି। ସେପଟେ ଘଟଣାକୁ ସ୍ୱୀକାର କରିଛନ୍ତି ଦାୟିତ୍ୱରେ ଥିବା ମେଡ଼ିସିନ୍ ବିଶେଷଜ୍ଞ ସି. ମାରାଣ୍ଡି।
ହେଲେ ଏଭଳି ଭୁଲ ବଡ଼ ମେଡିକାଲରେ ହେବା କଥା ନୁହଁ ବୋଲି କହିଛନ୍ତି ମେଡିସିନ ସ୍ପେଶାଲିଷ୍ଟ୍। ତେଣୁ ଏହାର ତଦନ୍ତ ମେଡିକାଲ ଅଧିକ୍ଷକ କରିବା କଥା ବୋଲି ସେ କହିଛନ୍ତି। ଏବଂ ଏନେଇ ବିଭାଗୀୟ ମୁଖ୍ୟଙ୍କୁ ଲିଖିତ ଭାବେ ଜଣାଇବାକୁ କହିଛନ୍ତି ଡାକ୍ତର ମାରାଣ୍ଡି।