ଜାଡେଜା ବିଶ୍ୱର ନଂ୧ ଟେଷ୍ଟ ଅଲରାଉଣ୍ଡର

ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଟିମ ଇଣ୍ଡିଆର ଅଲରାଉଣ୍ଡର ରବିନ୍ଦ୍ର ଜାଡେଜା ଆଉ ଏକ ୱାଲ୍ଡ ରେକର୍ଡ଼ ସୃଷ୍ଟି କରିଛନ୍ତି । ଦୁନିଆର ନମ୍ବର୧ ଟେଷ୍ଟ ଅଲରାଉଣ୍ଡର ହୋଇଛନ୍ତି ସେ । ଏନେଇ ଆଇସିସି ପକ୍ଷରୁ ଏକ ର୍ୟାଙ୍କିଂ ତାଲିକା ପ୍ରକାଶ କରାଯାଇଛି । ଯେଉଁଥିରେ ଶୀର୍ଷରେ ରହିଛନ୍ତି ରବିନ୍ଦ୍ର ଜାଡେଜା । ୱେଷ୍ଟଇଣ୍ଡିଜର ଅଲରାଉଣ୍ଡର ଜେସନ ହୋଲଡରଙ୍କୁ ହଟାଇ ପ୍ରଥମ ସ୍ଥାନ ଅଧିକାର କରିଛନ୍ତି ସେ । ଏହି ତାଲିକାରେ ୩୮୬ ନଂ ସହ ଜାଡେଜା ଶୀର୍ଷରେ ରହିଥିବା ବେଳେ ୩୮୪ ନଂ ସହ ଜେସନ ହୋଲଡର ଦ୍ୱିତୀୟ ସ୍ଥାନରେ ରହିଛନ୍ତି । ସେହିପରି ଇଂଲଣ୍ଡର ଅଲରାଉଣ୍ଡର ବେନ ଷ୍ଟୋକ ୩୭୭ ନଂ ସହ ତୃତୀୟ ସ୍ଥାନରେ ରହିଚନ୍ତି । ତେବେ ୩୫୩ ନଂ ସହ ଭାରତୀୟ ଦଳର ରବିଚନ୍ଦ୍ରନ ଅଶ୍ୱିନୀ ଚତୁର୍ଥ ସ୍ଥାନରେ ରହିଛନ୍ତି ।

ଅପରପକ୍ଷେ ଟେଷ୍ଟ ବ୍ୟାଟିଂ ତାଲିକା ମଧ୍ୟ ପ୍ରକାଶ କରିଛି ଆଇସିସି । ଯେଉଁଥିରେ ଶୀର୍ଷ ତିନିଜଣଙ୍କ ମଧ୍ୟରେ ରହିଛନ୍ତି ଭାରତୀୟ ଖେଳାଳି । ଟିମ୍ ଇଣ୍ଡିଆର ଅଧିନାୟକ ବିରାଟ କୋହଲି ୮୧୪ ପଏଣ୍ଟ ସହ ଚତୁର୍ଥ ସ୍ଥାନରେ ରହିଛନ୍ତି । ସେହିପରି ହିଟମ୍ୟାନ୍ ରୋହିତ ଶର୍ମା ୭୪୭ ପଏଣ୍ଟ ସହ ଷଷ୍ଠ ସ୍ଥାନରେ ଥିବା ବେଳେ ସମାନ ପଏଣ୍ଟ ସହ ସପ୍ତମ ସ୍ଥାନରେ ରହିଛନ୍ତି ଯୁବ ତାରକା ଋଷଭ ପନ୍ଥ । ତାଲିକାର ଶୀର୍ଷରେ ରହିଛନ୍ତି, ଅଷ୍ଟ୍ରେଲିଆର ଷ୍ଟିଭ୍ ସ୍ମିଥ । ଦ୍ୱିତୀୟ ସ୍ଥାନରେ ରହିଛନ୍ତି ନ୍ୟୁଜିଲାଣ୍ଡର ଅଧିନାୟକ କେନ୍ ୱିଲିୟମସନ୍ । ତୃତୀୟରେ ରହିଛନ୍ତି ଅଷ୍ଟ୍ରେଲିଆର ମାର୍ନସ ଲାବୁସେନ୍ । ଇଂଲଣ୍ଡର ଜୋ ରୁଟ୍ ପଞ୍ଚମ ସ୍ଥାନରେ ଥିବା ବେଳେ, ଅଷ୍ଟମରେ ହେନେରୀ ନିକୋଲ୍ସ, ନବମରେ ଡେଭିଡ୍ ୱାର୍ନର ଏବଂ ଦଶମରେ ଦକ୍ଷିଣଆଫ୍ରିକାର କ୍ୱିଣ୍ଟନ ଡିକକ ରହିଛନ୍ତି ।