ହେଲିକପ୍ଟରରେ ମୃତ ଦେହ ବାନ୍ଧି ପାଟ୍ରୋଲିଂ କଲା ତାଲିବାନ

କାବୁଲ(ବଡ଼ ଖବର ବ୍ୟୁରୋ):   ବନ୍ଧୁକ ମୁନରେ ଆଫଗାନିସ୍ତାନକୁ ଜବରଦଖଲ କରିଥିବା ତାଲିବନାର ଏବେ ଆଉ ଏକ କୃରତାର ଚିତ୍ର ସାମ୍ନାକୁ ଆସିଛି । ଆମେରିକାର ସୈନ୍ୟ ଆଫଗାନ ଛାଡିବା ପରେ ଏବେ ତାଲିବାନ ସେହି ଖୁସିରେ ସେଲିବ୍ରେସନ୍ କରୁଛି । ସମ୍ପୂର୍ଣ୍ଣ ଆଫଗାନିସ୍ଥାନରେ ଏବେ ନିଜ ହୁକୁମାତି ଆରମ୍ଭ କରିଛି । ଏବେ ଆମେରିକାର ସବୁଠାରୁ ଅତ୍ୟାଧୁନିକ ବ୍ଲାକ୍ ହକ୍ ହେଲିକେପ୍ଟରକୁ ନିଜେ ବ୍ୟବହାର କରୁଛି ତାଲିବାନ । ଏହାକୁ ବ୍ୟବହାର କରି ଆକାଶ ମାର୍ଗରେ ପାଟ୍ରୋଲିଂ କରୁଛି ।

ଏହି ସମୟରେ ଏକ ହୃଦୟ ବିଦାରକ ଚିତ୍ର ସାମ୍ନାକୁ ଆସିଛି । ତାଲିବାନ ପାଟ୍ରୋଲିଂ କରୁଥିବା ବେଳେ ଏଥିରେ ଗୋଟିଏ ଦଉଡି ଦ୍ୱାରା ଏକ ମୃତ ଦେହ ଝୁଲୁଥିବାର ଦେଖିବାକୁ ମିଳିଛି । ଏହି ମୃତ ଦେହକୁ ବ୍ଲାକ୍ ହକ୍ ହେଲିକେପ୍ଟରରେ କାନ୍ଦାହର ଆକାଶରେ ଉଡାଉଥିବା ଭିଡିଓ ଏବେ ଭାଇରାଲ ହଉଛି । ଯାହାକୁ ଅନେକ ସାମ୍ବାଦିକ ସେୟାର କରୁଛନ୍ତି । ତାଲିବାନ ଆତଙ୍କ ଉକ୍ତ ବ୍ୟକ୍ତିଙ୍କୁ ନିର୍ମମ ଭାବେ ହତ୍ୟା କରିବା ପରେ ସେମାନଙ୍କ ମୃତ ଦେହକୁ ଆକାଶ ମାର୍ଗକୁ ନେଇ ପାଟ୍ରୋଲିଂ କରୁଛି ।

ତେବେ ଝୁଲୁଥିବା ବ୍ୟକ୍ତି ଜଣଙ୍କ ମୃତ କି ଜୀବିତ ତାହା ଜଣାପଡୁନି । ପ୍ରଥମେ ଏହି ଭିଡିଓକୁ ତାଲିବ୍ ଟାଇମ୍ସ ପକ୍ଷରୁ ଟ୍ୱିଟ୍ କରାଯାଇଥିଲା । ଗତ ମାସରେ ଆମେରିକା ୭ ଟି ବ୍ଲାକ୍ ହକ୍ ହେଲିକେପ୍ଟର ସମେତ ଅନେକ ଅସ୍ତ୍ରଶସ୍ତ୍ର ଆଫଗାନକୁ ପଠାଇଥିଲା । ଏବେ ଆମେରିକା ସୈନ୍ୟ ଆଫଗାନ ଛାଡିଥିବାରୁ ସବୁକିଛି ତାଲିବାନ କବଜାକୁ ଚାଲିଯାଇଛି । ଯାହାର ଅପବ୍ୟବହାର କରି ତାଲିବାନ ସେଠାରେ ଆତଙ୍କ ଖେଳାଇଛି ।