ଭୁବନେଶ୍ୱର(ବଡ଼ ଖବର ବ୍ୟୁରୋ): ରାଜ୍ୟରେ ବଢିବାରେ ଲାଗିଛି ଅପରାଧିକ ମାମଲା । ଆଜି ବିଧାନସଭାରେ ସରକାର ଦେଇଥିବା ତଥ୍ୟରୁ ଏହା ସ୍ପଷ୍ଟ ହୋଇଛି । ଗୃହ ରାଷ୍ଟ୍ରମନ୍ତ୍ରୀ କ୍ୟାପଟେନ ଦିବ୍ୟଶଙ୍କର ମିଶ୍ର ଦେଇଥିବା ତଥ୍ୟ ଅନୁସାରେ ୨୦୧୯ ରେ ୧ ଲକ୍ଷ ୨୧ ହଜାର ୫୨୫ ହଜାର ମାମଲା ପଞ୍ଜିକୃତ ହୋଇଥିବା ବେଳେ ୨୦୨୦ ରେ ୧ ଲକ୍ଷ ୩୪ ହଜାର ୨୪୩ ମାମଲା ପଞ୍ଜିକୃତ ହୋଇଛି ।
ବିଧାୟକ ଗଣେଷ ରାମ ଖୁଣ୍ଟିଆଙ୍କ ପ୍ରଶ୍ନରେ ଗୃହ ରାଷ୍ଟ୍ରମନ୍ତ୍ରୀ ଏହି ଉତ୍ତର ଗୃହରେ ରଖିଛନ୍ତି । ଏହାସହ ଖୋର୍ଦ୍ଧା ଜିଲ୍ଲାର ଭୁବନେଶ୍ବର ସହରାଞ୍ଚଳରେ ୨୦୧୯ ରେ ୮ ହଜାର ୨୨୯ ମାମଲା ରୁଜୁ ହୋଇଥିବା ବେଳେ ୨୦୨୦ ରେ ୭ ହଜାର ୬୭୪ ମାମଲା ପଞ୍ଜିକୃତ ହୋଇଛି । ଅନ୍ୟପଟେ ରାଜ୍ୟ ପୋଲିସ ବିଭାଗରେ ମୋଟ ଅନୁମୋଦିତ ପଦବୀ ୬୭ ହଜାର ୭୬୧ ଥିବାବେଳେ ବର୍ତ୍ତମାନ ୫୬ ହଜାର ୩୦୫ ପଦବୀ ପୂରଣ ହୋଇଛି । ୧୧ ହଜାର ୪୫୬ ଟି ପଦବୀ ଖାଲି ପଡିଛି ।
ରାଜ୍ୟ ପୋଲିସରେ ୧୦ ଟି ଏଡିଜିପି ପଦବୀ ଥିବାବେଳେ ବର୍ତ୍ତମାନ ୧୧ ଜଣ ଅଛନ୍ତି । ଆଇଜିପି ପଦବୀ ୧୫ ଥିବାବେଳେ ବର୍ତ୍ତମାନ ୧୨ ଜଣ କାର୍ୟ୍ୟରତ ଅଛନ୍ତି ଓ ୩ ଟି ପୋଷ୍ଟ ଖାଲି ଅଛି । ଡିଆଇଜି ୨୦ ଟି ପଦବୀ ମଞ୍ଜୁର ପ୍ରାପ୍ତ ଥିବାବେଳେ ବର୍ତ୍ତମାନ ୭ ଜଣ କାର୍ୟ୍ୟରତ ଅଛନ୍ତି ଓ ୧୩ ଟି ପଦବୀ ଖାଲି ପଡିଛି । ଏହା ବାଦ ୬୩ ଏସପି ପଦବୀ ମଞ୍ଜୁରୀ ପ୍ରାପ୍ତ ଥିବାବେଳେ ୪୮ ଟି ପଦବୀ ବର୍ତ୍ତମାନ ପୂରଣ ହୋଇଛି ଓ ୧୫ ଟି ଖାଲି ରହିଛି ।
