ବିଜୟଙ୍କ ରାଜନୈତିକ ଉତ୍ତରାଧିକାରୀ ଅରବିନ୍ଦ!
କେନ୍ଦ୍ରାପଡ଼ା (ବଡ଼ ଖବର ବ୍ୟୁରୋ): ରାଜରାସ୍ତାରେ ବରିଷ୍ଠ ନେତା ବିଜୟ ମହାପାତ୍ରଙ୍କ ପୁଅ ଅରବିନ୍ଦ ମହାପାତ୍ର । ବାପା ବିଜୟଙ୍କ ପରେ ରାଜନୈତିକ ଉତ୍ତରାଧିକାରୀ ହେବେ କି ଅରବିନ୍ଦ? ସାଧାରଣ ଲୋକଙ୍କ ସମସ୍ୟାର ସମାଧାନ ପାଇଁ ସେ ଏବେ ରାସ୍ତାକୁ ଓହ୍ଲାଇଲେଣି । ଶତାଧିକ ସମର୍ଥକଙ୍କ ସହିତ ଶୋଭାଯାତ୍ରାରେ ଯାଇ ଗରଦପୁର ବ୍ଲକ୍ ଅଫିସ୍ ଆଗରେ କରିଛନ୍ତି ଆନ୍ଦୋଳନ । ଠିକ୍ ବାପାଙ୍କ ଢାଞ୍ଚାରେ । ଆବାସ ଯୋଜନାରେ ବାଦ୍ ପଡ଼ିଥିବା ଯୋଗ୍ୟ ହିତାଧିକାରୀ ଚୟନ, ରାସନକାର୍ଡରେ ନୂତନ ନାମ ସଂଯୋଗ ଦାବି କରିଛନ୍ତି ଅରବିନ୍ଦ । ଖାଲି ସେତିକି ନୁହେଁ ବ୍ଲକ୍ରେ ଚାଲିଥିବା ଦୁର୍ନୀତି ବିରୋଧରେ ସ୍ୱର ଶାଣିତ କରିଛନ୍ତି। କୌଣସି ଦଳୀୟ ବ୍ୟାନରେ ନୁହେଁ । ସ୍ୱାଭିମାନ ମଂଚ ବ୍ୟାନରେ ସେ କରିଛନ୍ତି ଆନ୍ଦୋଳନ ।
ଅରବିନ୍ଦଙ୍କ ଏପ୍ରକାର ଆନ୍ଦୋଳନ ପାଟକୁରା ରାଜନୀତିକୁ ସରଗରମ କରିଛି। ଗତ ଜାନୁଆରୀ ୮ରେ ପାଟକୁରା ନିର୍ବାଚନମଣ୍ଡଳୀର ତିକନପୁରରେ ବିଜୟ ଆୟୋଜନ କରିଥିଲେ ବଂଧୁମିଳନ ସମାବେଶ । ସେଥିରେ ସାମିଲ୍ ହୋଇଥିଲେ ଅରବିନ୍ଦ । ବିଜୟ ବୋଲି ଖୋଲାଖୋଲି ଘୋଷଣା କରିଥିଲେ ତାଙ୍କର ରାଜନୈତିକ ଉତ୍ତରାଧିକାରୀ ହେବେ ଅରବିନ୍ଦ । କିନ୍ତୁ ଦଳ ସଂପର୍କରେ ମୁହଁ ଖୋଲିନଥିଲେ ବିଜୟ । କହିଥିଲେ ତିନି ମାସ ଭିତରେ ସବୁ ସ୍ପଷ୍ଟ ହେଇଯିବ । ୨୦୨୪ ନିର୍ବାଚନରେ ନୂଆ ସମୀକରଣ ସୃଷ୍ଟି ହେବ ବୋଲି ବିଜୟ ସୂଚାଇ ଦେଇଥିଲେ । ଜାନୁଆରୀ ୮ରେ ବିଜୟଙ୍କ ସଂକେତ ଆଉ ଆଜି ପୁଅ ଅରବିନ୍ଦଙ୍କ ପ୍ରଥମ ଥର ପାଇଁ ରାଜନୈତିକ କାର୍ଯ୍ୟକ୍ରମ କେନ୍ଦ୍ରାପଡ଼ା ରାଜନୀତିରେ ଚର୍ଚ୍ଚାର ଖୋରାକ ଯୋଗାଇଛି।
ବ୍ଲକ୍ କାର୍ଯ୍ୟାଳୟ ସମ୍ମୁଖରେ ଅରବିନ୍ଦଙ୍କ ଭାଷଣରୁ ସ୍ପଷ୍ଟ ବାରି ହୋଇପଡୁଥିଲା ତାଙ୍କର ରାଜନୈତିକ ବ୍ୟକ୍ତିତ୍ୱ । ବ୍ଲକ୍ ସ୍ତରରେ ହେଉଥିବା ଦୁର୍ନୀତିକୁ ନେଇ ପ୍ରଶ୍ନ ଉଠାଇ ସେ ସିଧାସଳଖ ୨୩ବର୍ଷର ବିଜେଡି ସରକାରକୁ ଟାର୍ଗେଟ କରିଥିଲେ । ଏତେ ଦୁର୍ନୀତି କିଭଳି ହେଉଛି ବୋଲି ସେ ପ୍ରଶ୍ନ କରିଥିଲେ । ଦାବି ପୂରଣ ନ ହେଲେ ଆଗାମୀ ଦିନରେ ଆନେ୍ଦାଳନ ଜୋରଦାର ହେବ ବୋଲି ଅରବିନ୍ଦ ଚେତାଇ ଦେଇଛନ୍ତି । ଅରବିନ୍ଦଙ୍କ ଶାଣିତ ସ୍ୱର ଓ ଆକ୍ରମଣାତ୍ୱକ ଶୈଳୀ ଭବିଷ୍ୟତରେ ସେ ବାପାଙ୍କ ଯୋଗ ରାଜନୈତିକ ଉତ୍ତରାଧିକାରୀ ହୋଇପାରିବେ ବୋଲି ରାଜନୈତିକ ପଣ୍ଡିତମାନେ ଆଶା କରୁଛନ୍ତି ।
