୪ର୍ଥ ଟି-୨୦ ବିଜୟ ସହ ସିରିଜ ହାତେଇଲା ଭାରତ

ରାୟପୁର (ବଡ଼ ଖବର ବ୍ୟୁରୋ): ରାୟପୁର ଟି-୨୦ରେ ଭାରତର ବିଜୟ। ଅଷ୍ଟ୍ରେଲିଆକୁ ୨୦ ରନରେ ହରାଇଲା ଭାରତ। ୪ର୍ଥ ଟି-୨୦ ବିଜୟ ସହ ସିରିଜ ହାତେଇଲା ଭାରତ। ୫ ମ୍ୟାଚ ବିଶିଷ୍ଟ ସିରିଜରେ ଭାରତ ୩-୧ରେ ଅଗ୍ରଣୀ ରହିଛି। ରାୟପୁରର ସହିଦ ବୀର ନାରାୟଣ ସିଂ ଅନ୍ତର୍ଜାତୀୟ ଷ୍ଟାଡିୟମଠାରେ ଖେଳାଯାଇଥିବା ୪ର୍ଥ ଟି-୨୦ରେ ଅଷ୍ଟ୍ରେଲିଆକୁ ୨୦ ରନରେ ହରାଇ ଭାରତ ସିରିଜ ଜିତିଛି। ଭାରତ ପକ୍ଷରୁ ରଖାଯାଇଥିବା ୧୭୫ ରନ ବିଜୟ ଲକ୍ଷ୍ୟ ଜବାବରେ ଅଷ୍ଟ୍ରେଲିଆ ୨୦ ଓଭରରେ ମାତ୍ର ୧୫୪ ରନ କରିପାରିଥିଲା।

ଦଳ ପକ୍ଷରୁ ଅଧିନାୟକ ମାଥ୍ୟୁ ୱାଡେ ୩୬ ରନ, ଟ୍ରାଭିସ୍ ହେଡ୍ ୩୧ରନ ଓ ମାଥ୍ୟ ସର୍ଟ ୨୨ ରନ କରିଥିଲେ । ଭାରତ ପକ୍ଷରୁ ଅକ୍ଷର ପଟେଲ ୩ ୱିକେଟ ନେଇଥିବାବେଳେ ଦୀପକ ଚହର ୨ଟି ଓ୍ବିକେଟ୍ ନେଇଥିଲେ। ମ୍ୟାଚରେ ଅଷ୍ଟ୍ରେଲିଆ ଟସ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା। ଭାରତର ଦୁଇ ଓପନର ଋତୁରାଜ ଗାକ୍ୱାଡ୍ ଓ ଯଶସ୍ବୀ ଜୟସ୍ବାଲ ସତର୍କତାର ସହ ଇନିଂସ ଆରମ୍ଭ କରିଥିଲେ। ଉଭୟ ପ୍ରଥମ ୱିକେଟ ଯୋଡ଼ିରେ ୫୦ ରନ କରିଥିଲେ। ଜୟସ୍ବାଲ ୩୭, ଶ୍ରେୟସ ଆୟର ୮ ଓ ଅଧିନାୟକ ସୂର୍ୟ୍ୟକୁମାର ୧ ରନ କରି ଆଉଟ ହୋଇଥିଲେ। ଅଷ୍ଟ୍ରେଲିଆ ପକ୍ଷରୁ ବେନ ଡ୍ବାରସୁଇସ୍ ୩ଟି ୱିକେଟ ନେଇଥିବାବେଳେ ଜାସନ ବେହେରେନଡ୍ରଫ ଓ ତନବୀନ ସାଙ୍ଗା ୨ଟି ଲେଖାଏଁ ୱିକେଟ ହାସଲ ନେଇଥିଲେ।