ଜଳିଗଲା ଲକ୍ଷାଧିକ ଟଙ୍କାର ଧାନ

ସୋର (ବଡ଼ ଖବର ବ୍ୟୁରୋ):ଜଳି ଗଲା ଧାନ ବଦାଡି । ସର୍ବସ୍ୱ ହରାଇଲା ଚାଷୀ । ମେସିନରେ ଧାନ ଅମଳକୁ ନେଇ ଘଟିଲା ଅଘଟଣ। ଜଳି ପାଉଁଶ ହୋଇଗଲା ୫ ଏକର ଜମିର ଧାନ । ଏଭଳି ଘଟଣା ଦେଖିବାକୁ ମିଳିଛି ମଇତାପୁର ଅଞ୍ଚଳରେ। ସୂଚନା ଅନୁଯାୟୀ ସିମୁଳିଆ ବ୍ଲକ୍ ମଇତାପୁର ଅଞ୍ଚଳର ସୁବାଷ ବାରିକଙ୍କ ଖଳାରେ ମେସିନ ସାହାଯ୍ୟ ଧାନ ପିଟୁ ଥିବା ବେଳେ ହଠାତ ଅଗ୍ନିକାଣ୍ଡ ଘଟିଥିଲା। ସ୍ଥାନୀୟ ଲୋକେ ବହୁ ଚେଷ୍ଟା କରି ବିଫଳ ହୋଇଥିଲେ । ନିଆଁ ଲିଭାଇବା ପାଇଁ ଭଦ୍ରକ ଦମକଳ ବାହିନୀଙ୍କୁ ଖବର ଦିଆଯାଇଥିଲା। ଭଦ୍ରକ ଦମକଳ ବାହିନୀ ନିଆଁକୁ ଆୟତ୍ତ କରିଥିଲେ। ସୁବାଷ ଲକ୍ଷାଧିକ ଟଙ୍କା ଖର୍ଚ୍ଚ କରି ବସୁମତୀ ଧାନ ଚାଷ କରିଥିବା ବେଳେ ଅମଳ ସମୟରେ ନିଆଁ ଲାଗି ସବୁ କିଛି ଛାରଖାର ହୋଇଯାଇଛି ।