ଘଷିପୁରାରେ କାଉଣ୍ଟିଂ ପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ

ଘଷିପୁରା (ବଡ଼ ଖବର ବ୍ୟୁରୋ): ଆସନ୍ତାକାଲି ହେବ ଭୋଟ ଗଣତି। ଯାହାକୁ ନେଇ ପ୍ରଶାସନ ସ୍ତରରେ ପ୍ରସ୍ତୁତି ଶେଷ ପର୍ଯ୍ୟାୟରେ। କେନ୍ଦୁଝର ଜିଲ୍ଲାର ଆନନ୍ଦପୁର ଓ ଘଷିପୁରା ନିର୍ବାଚନମଣ୍ଡଳୀିର ଭୋଟ ଗଣତି ନିମନ୍ତେ ଶାଳପଡା କନକମଞ୍ଜରୀ ମହିଳା ମହାବିଦ୍ୟାଳୟରେ ବ୍ୟବସ୍ଥା କରାଯାଇଛି। ଏହି ୨ ନିର୍ବାଚନମଣ୍ଡଳି ନିମନ୍ତେ ନିର୍ବାଚନ ପରିଚାଳନା ଏହି ମହାବିଦ୍ୟାଳୟରୁ କରାଯାଉଥିବା ବେଳେ ସୁବ୍ୟବସ୍ଥିତ ଭାବେ ଭୋଟ ଗଣତି ନିମନ୍ତେ ସମସ୍ତ ପ୍ରସ୍ତୁତି ଶେଷ କରାଯାଇଥିବା ଉପଜିଲ୍ଲାପାଳ ପ୍ରକାଶ କରିଛନ୍ତି।

ଉଭୟ ଲୋକସଭା ଓ ବିଧାନସଭା ନିମନ୍ତେ ଆନନ୍ଦପୁର ନିର୍ବାଚନମଣ୍ଡଳିର ୧୨ ଟି ଟେବଲରେ ଭୋଟ ଗଣତି କରାଯିବାକୁ ଥିବା ବେଳେ ୨୫ ରାଉଣ୍ଡରେ ଭୋଟ ଗଣତି ଶେଷ ହେବ । ସେହିଭଳି ଘଷିପୁରା ନିର୍ବାଚନମଣ୍ଡଳି ପାଇଁ ୧୪ ଟି ଟେବୁଲରେ ଭୋଟ ଗଣତି ହେବାକୁ ଥିବା ବେଳେ ଏହା ୨୨ ରାଉଣ୍ଡରେ ଶେଷ ହେବ ବୋଲି ପ୍ରକାଶ କରିଛନ୍ତି। ତେବେ ଭୋଟ ଗଣତି ସୁରୁଖୁରୁରେ ହେବାକୁ ଥିବା ବେଳେ ଜନମତକୁ ନେଇ ଆନନ୍ଦପୁର ଅଞ୍ଚଳରେ ଶାନ୍ତିଶୃଙ୍ଖଳା ବଜାୟ ରଖିବାକୁ ଅନୁରୋଧ ରଖିଛନ୍ତି ଉପଜିଲ୍ଲାପାଳ।