କରୋନା ଉଜାଡିଛି କୁଳ ବେଉସା
ଟାଙ୍ଗୀ, (ବଡ଼ ଖବର ବ୍ୟୁରୋ): ଆଉ ଦିନ କେଇଟା ପରେ ଦୀପାବଳି । ଦୀପାବଳିକୁ ନେଇ ତତ୍ପର କୁମ୍ଭାର ପରିବାର। ଖୋର୍ଦ୍ଧା ଜିଲ୍ଲା ଟାଙ୍ଗୀ ବ୍ଲକ ବଡ଼ପାରୀ ପଞ୍ଚାୟତ ଅହିଅରା ଗାଁରେ ରୁହନ୍ତି ୭ କୁମ୍ଭାର ପରିବାର । ମାଟିରେ ବିଭିନ୍ନ ସାମଗ୍ରୀ ତିଆରି କରି ନିଜର ଗୁଜୁରାଣ ମେଣ୍ଟାଉଛନ୍ତି ଏମାନେ । ମୁଖ୍ୟତଃ ଦୀପାବଳି ସମୟରେ ଏମାନେ ଦୀପ ତିଆରି କରି ଅଧିକ ଦି’ ପଇସା ପାଇଥାନ୍ତି । କିନ୍ତୁ ଚଳିବର୍ଷ କରୋନା କଟକଣା ସବୁକିଛି ସାରିଦେଇଛି ।
ଟଙ୍କା ନ ଥିବାରୁ ଧାର କରଜ କରି ଏମାନେ ଆରମ୍ଭ କରିଛନ୍ତି ଦୀପ ତିଆରି କାମ । ବଜାରରେ ମହମବି ଓ ଲିଚୁ ଲାଇଟର ଚାହିଦା ବଢୁଥିବାରୁ ମାଟିଦୀପ ବିକ୍ରି ହେବ କି ନାହିଁ ଚିନ୍ତାରେ ଏହି କୁମ୍ଭାର ପରିବାର । ଯେଉଁ ଦୀପ ଦିନେ ବର୍ଷସାରା ରୋଜଗାର ଦେଉଥିଲା ଆଜି ତାହା ସେମାନଙ୍କ ଲାଗି ସମସ୍ୟା ପାଲଟିଛି । ସେପଟେ ସରକାରଙ୍କ ପ୍ରୋତ୍ସାହନ ଅଭାବରୁ ଦୁର୍ଦ୍ଦିନରେ ଦିନ କାଟୁଥିବା କହିଛନ୍ତି କୁମ୍ଭାର ପରିବାର। ଆଗକୁ ଯଦି ପ୍ରଶାସନ କୁମ୍ଭାର ପରିବାରକୁ ଦୃଷ୍ଟି ନ ଦିଅନ୍ତି ତେବେ ଆଉ ଦୀପ ତିଆରି କରିବେ ନାହିଁ ବୋଲି କହିଛନ୍ତି ଏମାନେ । ଏବେ ଦେଖିବାକୁ ବାକି ରହିଲା କେବେ ଏମାନଙ୍କ ଉପରେ ପଡ଼ୁଛି ସରକାରଙ୍କ ନଜର ।