ପାରାଦୀପ (ବଡ଼ ଖବର ବ୍ୟୁରୋ): ଜଙ୍ଗଲ କିସମ ଜମିକୁ ଅକ୍ତିଆର ପାଇଁ କିଛି ଲୋକଙ୍କ ଦାଦାଗିରି ଚରମ ସୀମାରେ ପହଞ୍ଚିଛି । ଗ୍ରାମ୍ୟ ଜଙ୍ଗଲର ତାରବାଡ଼ କାଟିବା ସହିତ ସିମେଣ୍ଟ ଖୁଣ୍ଟ ଭାଙ୍ଗି ଦେଇଛନ୍ତି କିଛି ଅସାଧୁ ବ୍ୟକ୍ତି । ପ୍ରତିବାଦ କରିଥିବା ମହିଳାଙ୍କୁ ଭୁଜାଲି ଦେଖାଇ ଧମକାଇଥିବା ଅଭିଯୋଗ ମଧ୍ୟ ହୋଇଛି । ପାରାଦୀପ ଲକ ଥାନା ଅଞ୍ଚଳରୁ ଆସିଛି ଏଭଳି ଖବର ।
ଗଡ଼ ପଞ୍ଚାୟତ ନିହାରୁଣୀ କନ୍ଦା ଗ୍ରାମରେ ଥିବା ଜଙ୍ଗଲ କିସମ ଓ ଅନାବାଦୀ ଜମିକୁ କିଛି ଅସାଧୁ ଲୋକ ଗୁଣ୍ଡାଗିରି କରି ଅକ୍ତିଆର କରିଥିବା ଥାନାରେ ଅଭିଯୋଗ କରିଛନ୍ତି ମହିଳା । ଏକ ଏକରରୁ ଅଧିକ ଜମିକୁ ମାଡି ବସିଥିବା କହିଛନ୍ତି ସ୍ୱଂୟ ସହାୟକ ଗୋଷ୍ଠୀର ମହିଳାମାନେ ।
୧୯୯୯ ମହାବାତ୍ୟା ପରେ କିଛି ମହିଳା ଗୋଷ୍ଠୀ ମିଶି ନିଜସ୍ୱ ଟଙ୍କା ଖର୍ଚ୍ଚ କରି ଏହି ଜମିରେ ବୃକ୍ଷରୋପଣ କରିଥିଲେ। ଏମାନେ ଜଗାରଖା କରିବା ସହ ଗଛର ଯତ୍ନ ମଧ୍ୟ ନେଉଥିଳେ । ମାତ୍ର ଉକ୍ତ ଜମିକୁ ଲାଗିଥିବା ସ୍ଥିତବାନ ଜମିକୁ କିଛି ଲୋକ କିଣି ଏଠାରେ ଘର କରିଛନ୍ତି। ଯାହାକୁ ନେଇ ଗ୍ରାମ୍ୟ କମିଟି ତହସିଲଦାରଙ୍କ ଦ୍ୱାରସ୍ଥ ହେବା ପରେ ଏହି ଜାଗାର ମାପ କରାଯାଇଥିଲା। ପୋଲିସ, ତହସିଲଦାର , ଆରଆଇଙ୍କ ଉପସ୍ଥିତିରେ ଉକ୍ତ ଜାଗାକୁ ସିମେଣ୍ଟ ଖୁଣ୍ଟ ପୋତା ଯାଇ ତାର ଜାଲି ବୁଲାଯାଇଥିଲା । କିନ୍ତୁ ଉକ୍ତ ବ୍ୟକ୍ତି ଜଣକ ଗୁଣ୍ଡା ଲଗାଇ ତାର ବାଡ଼କୁ ଭାଙ୍ଗି ଦେଇଥିଲେ । ଆଉ ପ୍ରତିବାଦ କରିଥିବା ମହିଳାଙ୍କୁ ସେମାନେ ଭୁଜାଲି ଦେଖାଇ ଭୟଭୀତ କରାଇଥିଲେ । ଏହି ଅସାମାଜିକ ବ୍ୟକ୍ତିକୁ ଗିରଫ କରାଯାଉ ବୋଲି ସାଧାରଣରେ ଦାବି ହୋଇଛି ।
