କେବେ ମିଳିବ ଆବାସ ଯୋଜନାରେ ଘର

କଣିହାଁ (ବଡ଼ ଖବର ବ୍ୟୁରୋ): ଆବାସ ଯୋଜନା ସାତସପନ । ଭଙ୍ଗାଘରେ ଜୀବନ ବିତାଉଛନ୍ତି ଅସହାୟ ପରିବାର । ଅନୁଗୁଳ ଜିଲ୍ଲା କଣିହାଁ ବ୍ଲକ ସୁଶୁବା ପଞ୍ଚାୟତ ଗେଙ୍ଗୁଟିଆ ଗାଁରୁ ଆସିଛି ଏଭଳି ଚିତ୍ର । ଏହି ଗାଁରେ ରୁହନ୍ତି ଗୁରୁବାରିଆ ଦେହୁରୀଙ୍କ ପରିବାର । ପରିବାର କହିଲେ ଗୁରୁବାରିଆ, ତାଙ୍କ ସ୍ତ୍ରୀ ଗୁଞ୍ଜ ପୁଇ ରିପୁନ ଏବଂ ସିପୁନ । ଏହି ଆଦିବାସୀ ପରିବାର ଗାଁରେ ଗୋରୁ ଚରାଇବା ସହ ମୂଲମଜୁରି ଲାଗି ଯେନତେନ ଚଳିଯାଆନ୍ତି ।

ବାଉଁଶ, ବରଡ଼ା ଛପର ଘରେ ଜୀବନକୁ ବାଜି ଲଗାଇ ରହୁଛନ୍ତି ଏହି ପରିବାର। ରାତିରେ ସାପ ଭୟ। ବର୍ଷା ହେଲେ ଘରେ ଆଣ୍ଠୁଏ ପାଣି। ଏମିତି ଅବସ୍ଥାରେ ଜୀବନ ବିତାଉଛନ୍ତି ଏହି ପରିବାର। ଘରଖଣ୍ଡିଏ କରିବା ପାଇଁ ସମ୍ବଳ ନାହିଁ । ଆବାସ ଯୋଜନାରେ ଘର ଖଣ୍ଡିଏ ପାଇଁ ଦୌଡ଼ି ଦୌଡ଼ି ନୟାନ୍ତ ହେଲେଣି । କିନ୍ତୁ ଏପର୍ୟ୍ୟନ୍ତ ତାଙ୍କୁ ଘର ମିଳି ନାହିଁ । ଶେଷରେ ନିରାଶ ହୋଇ ବଡ଼ ଖବର ମାଧ୍ୟମରେ ସରକାରଙ୍କୁ ଜଣାଇଛନ୍ତି ଏହି ପରିବାର ।