ଚିରା ପଲିଥିନ ତଳେ ଜୀବନ
ବଙ୍ଗୋମୁଣ୍ଡା (ବଡ଼ ଖବର ବ୍ୟୁରୋ): ସରକାର ବିଭିନ୍ନ ଯୋଜନାରେ ରାଜକୋଷରୁ କୋଟିକୋଟି ଟଙ୍କା ବ୍ୟୟ କରୁଥିବା ବେଳେ ପ୍ରଶାସନିକ ଉଦାସୀନତା ଏବଂ ରାଜନୈତିକ ଇଚ୍ଛାଶକ୍ତିର ଅଭାବ ଯୋଗୁଁ ଯୋଜନାର ସୁଫଳ ସାଧାରଣ ଲୋକଙ୍କ ପାଖରେ ପହଞ୍ଚି ପାରୁନାହିଁ । ସରକାର ସମସ୍ତ କଚ୍ଚାଘରକୁ ପକ୍କା କରିବାର ସ୍ଲୋଗାନ ଦେଉଥିବା ବେଳେ ବର୍ଷବର୍ଷ ଧରି ବୃଦ୍ଧା ଜଣକ ଚିରା ପଲିଥିନ ତଳେ ଅତି ଦୟନୀୟ ଅବସ୍ଥାରେ ରହୁଥିଲେ ମଧ୍ୟ ଏଥିପ୍ରତି କାହାରି ଦୃଷ୍ଟି ନପଡିବା ଅତ୍ୟନ୍ତ ପରିତାପର ବିଷୟ ।
ଦାଦନ ପ୍ରବଣ ବଙ୍ଗୋମୁଣ୍ଡା ବ୍ଲକର ଅଲଣ୍ଡା ପଞ୍ଚାୟତର ବକାଗୁରା ଗ୍ରାମର ଦଳିତ ବୃଦ୍ଧ କୃଷ୍ଣ ମହାନନ୍ଦ । ବୟସ ୭୦ । ଗତ ୧୨ ବର୍ଷ ହେଲା ହେବ ଘର ଖଣ୍ଡିଏ ନ ଥିବାରୁ ଚିରା ପଲିଥିନ ତଳେ ଅତି ଦୟନୀୟ ଅବସ୍ଥାରେ ଜୀବନ ବିତାଉଛନ୍ତି । ବର୍ଷା ହେଉ କି ଶୀତ ଚିରା ପଲିଥିନ ଢଙ୍କା ଭଙ୍ଗା ଦଦରା ଚାଳ ହିଁ ତାଙ୍କର ଆପଣାର । ସେଇଠାରେ ବର୍ଷ ବର୍ଷ ଧରି ରହିଆସୁଛନ୍ତି । ପରିବାର କହିଲେ ସେ ଜଣେ । ସ୍ତ୍ରୀ ୧୪ ବର୍ଷ ହେଲା ଆରପାରିକୁ ଚାଲିଗଲେଣି । ପୁଅ ଝିଅ ମଧ୍ୟ କେହି ନାହାନ୍ତି । ଏକା ଏକା ଅସହାୟ ଅବସ୍ଥାରେ ବାଟ ଚାଲିଛନ୍ତି ।
ବାରମ୍ବାର ଗୁହାରୀ କରି ନୟାନ୍ତ ହୋଇଯିବା ପରେ ଘର ଖଣ୍ଡିଏ ମିଳିବା ଆଶା ମଧ୍ୟ ଛାଡିଦେଇଛନ୍ତି । ଅତି ଦୟନୀୟ ଅବସ୍ଥାରେ ରହୁଥିବା ବୃଦ୍ଧା ଜଣଙ୍କୁ ଘର ଖଣ୍ଡିଏ ଯୋଗାଇଦେବା ପାଇଁ ପ୍ରଶାସନ ଦୃଷ୍ଟି ଦେବାକୁ ଦାବି ହେଉଛି । ଏ ସଂପର୍କରେ ବଙ୍ଗୋମୁଣ୍ଡା ବିଡିଓ ରିପୁନାଥ ସୁନାଙ୍କୁ ଦୃଷ୍ଟି ଆକର୍ଷଣ କରିବାରୁ ଏହାର ତଦନ୍ତ କରି ଆବଶ୍ୟକ ପଦକ୍ଷେପ ଗ୍ରହଣ କରାଯବି ବୋଲି କହିଛନ୍ତି ।
