ପ୍ରଦୀପ ଓ ଭୃଗୁ ଲଢେଇ ଭିତରେ ବାଜିମାରି ନେବେ ରଶ୍ମି !
ଭୁବନେଶ୍ୱର (ବଡ଼ ଖବର ବ୍ୟୁରୋ): ୨୪ ସାଧାରଣ ନିର୍ବାଚନର ଓଡ଼ିଶାର ସବୁଠୁ ହଟ୍ ସିଟ୍ ହେଉଛି ଗଞ୍ଜାମ ଜିଲ୍ଲାର ବ୍ରହ୍ମପୁର ସଂସଦୀୟ କ୍ଷେତ୍ର । ରାଜ୍ୟ ରାଜନୀତିର ପୃଷ୍ଠଭୂମି ପାଲଟିଛି ଏହି ଆସନ । ଆମଦାନୀ ନେତା ଧରିଛନ୍ତି ଦୁଇ ପ୍ରମୁଖ ରାଜନୀତିକ ଦଳର ମଙ୍ଗ । ଜଣେ ବହିଷ୍କୃତ ତ ଆଉ ଜଣେ ଦଳ ପରିବର୍ତ୍ତନ ନେତା । ବିଜେପି ଓ ବିଜେଡିରୁ ହୋଇଛନ୍ତି ପ୍ରାର୍ଥୀ । ବିଜେଡିରୁ ବହିଷ୍କୃତ ଗୋପଳପୁର ବିଧାୟକ ପ୍ରଦୀପ ପାଣିଗ୍ରାହୀଙ୍କୁ ବିଜେପି କରିଛି ସାଂସଦ ପ୍ରାର୍ଥୀ ।
ବିଜେଡି କିନ୍ତୁ ଖେଳିଛି ଖେଳ । ୨୦୧୯ରେ ବିଜେପିରୁ ହୋଇଥିବା ପ୍ରାର୍ଥୀ ଭୃଗୁ ବକ୍ସିପାତ୍ର ପ୍ରଦୀପଙ୍କ ପ୍ରାର୍ଥୀତ୍ୱକୁ ନେଇ ଥିଲେ ନାଖୁସ । ଯାହାର ସୁଯୋଗ ଅପେକ୍ଷାରେ ଥିଲେ ଭୃଗୁ । ଯାହାର ଫାଇଦା ଓଠାଇଲା ବିଜେଡି । ମଉକା ଦେଖି ଭୃଗୁ ମାରିଲେ ଛକା ।୧୯ରେ ହୋଇଥିବା ସାଂସଦ ଚନ୍ଦ୍ରଶେଖର ସାହୁଙ୍କୁ ବିଜେଡି ବାଦ ପକାଇ ୨୦୧୯ରେ ଦଳର ପ୍ରତିଦ୍ୱନ୍ଦୀଙ୍କୁ ନିଜ ଦଳରେ ସାମିଲ କରି ମଇଦାନକୁ ଓହ୍ଲାଇଛନ୍ତି ସୁପ୍ରିମ ନବୀନ ପଟ୍ଟନାୟକ ।
୨୪ ଯୋଦ୍ଧା ଭାବେ ଦଳ ଭୃଗୁଙ୍କୁ କରିଛି ଭରଷା । ଶାସକ ବିଜେଡି ଓ ମୁଖ୍ୟ ବିରୋଧୀ ବିଜେପି ଟଣାଓଟରା ଭିତରେ ରଶ୍ମୀ ରଞ୍ଜନ ପଟ୍ଟନାୟକଙ୍କୁ କଂଗ୍ରେସ କରିଛି ଆଶା । ରଶ୍ମୀଙ୍କୁ ପ୍ରାର୍ଥୀ କରି ଦଳ ଆମଦାନୀ ହଟାଅ ବ୍ରହ୍ମପୁର ବଞ୍ଚାଅର ଦେଇଛି ନାରା । ଯାହାର ଫାଇଦା ନେବାକୁ ବି ଅନେଇ ବସିଛି କଂଗ୍ରେସ । କିନ୍ତୁ ବ୍ରହ୍ମପୁର ଜନତାଙ୍କ ହାତରେ ଦଳ ଓ ପ୍ରାର୍ଥୀଙ୍କ ଭାଗ୍ୟ । କାହିଁକି ନା କାମ ପାଇଁ ଏଠୁ ହଜାର ହଜାର ଲୋକେ ବାହାର ରାଜ୍ୟ ଉପରେ ନିର୍ଭର କରିଥାନ୍ତି । ପ୍ରବାସୀ ଭୋଟର ହିଁ ଲୋକ ପ୍ରତିନିଧି ଚୟନର ବନିଥାନ୍ତି ସୁତ୍ରଧାର । ଯାହାକୁ ଯିବ ପ୍ରବାସୀ ଭୋଟ , ସେହି ପ୍ରାର୍ଥୀ ବନିପାରନ୍ତି ସିକନ୍ଦର ।