ଦୁର୍ଘଟଣାରେ ଚାଲିଗଲା କରୋନା ଯୋଦ୍ଧାଙ୍କ ଜୀବନ

ନୀଳଗିରି, (ବଡ଼ ଖବର ବ୍ୟୁରୋ): ଦୁର୍ଘଟଣାରେ ଚାଲିଗଲା କରୋନା ଯୋଦ୍ଧାଙ୍କ ଜୀବନ । କରୋନା ଭଳି ମହାମାରୀ ସମୟରେ ନିଜ ଜୀବନକୁ ବାଜି ଲଗାଇ ରୋଗୀମାନଙ୍କ ସେବା କରୁଥିବା ମହିଳା ଚିକିତ୍ସକ ଆଜି ଜୀବନ ଯୁଦ୍ଧରେ ହାରି ଯାଇଛନ୍ତି । ନୀଳଗିରି ଉପଖଣ୍ଡ ଚିକିତ୍ସାଳୟରେ କାର୍ୟ୍ୟରତ ମହିଳା ଚିକିତ୍ସକଙ୍କର ଦୁର୍ଘଟଣାରେ ମୃତ୍ୟୁ ହୋଇଛି । ସୂଚନାଥାଉକି ଡଃ. ଶାନ୍ତିଲତା ଗିଡ଼ି ବୟସ ୫୪ ବର୍ଷ ନୀଳଗିରି ଉପଖଣ୍ଡ ଚିକିତ୍ସାଳୟରେ ଦୀର୍ଘ ୫ ରୁ ୬ ବର୍ଷ ହେବ କାର୍ୟ୍ୟରତ ଥିଲେ । ଡ଼ଃ ଗିଡ଼ି ଅବିବାହିତା ରହି ସାରା ଜୀବନ ରୋଗୀଙ୍କ ସେବାରେ ସମର୍ପିତ ଥିଲେ । ସେ ଜଣେ କର୍ମନିଷ୍ଠ ଓ ଦରଦୀ ହୃଦୟର ମଣିଷ ଥିଲେ । ତାଙ୍କର ଅକାଳ ବିୟୋଗରେ ସମଗ୍ର ନୀଳଗିରି ଅଞ୍ଚଳରେ ଶୋକର ଛାୟା ଖେଳିଯାଇଛି ।

କାଲି ରାତିରେ କାର୍ଯ୍ୟ ସାରି ଘରକୁ (ବାଲେଶ୍ୱର ) ଅଭିମୁଖେ ଯାଉଥିବା ବେଳେ ଶେରଗଡ଼ ନିକଟରେ ତାଙ୍କ ଗାଡ଼ି ସାମ୍ନାକୁ ଷଣ୍ଢଟିଏ ଚାଲି ଆସିବାରୁ ଗାଡ଼ିଟି ଭାରସାମ୍ୟ ହରାଇଥିଲା ଏବଂ ସେ ତଳକୁ ଖସିପଡିଥିଲେ । ତୁରନ୍ତ ତାଙ୍କୁ ଗୁରୁତର ଅବସ୍ଥାରେ ବାଲେଶ୍ୱର ଜିଲ୍ଲା ମୁଖ୍ୟ ଚିକିତ୍ସାଳୟ ନିଆଯାଇଥିଲା ସେଠାରେ ତାଙ୍କର ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ଭୁବନେଶ୍ୱର ନେବା ସମୟରେ ରାସ୍ତାରେ ତାଙ୍କର ମୃତ୍ୟୁ ହୋଇଥିଲା । ତାଙ୍କ ପାର୍ଥିବ ଶରୀରକୁ ନୀଳଗିରି ଅଣାଯିବା ପରେ ସେଠାରେ ସମସ୍ତ କର୍ମଚାରୀ ପୁଷ୍ପମାଲ୍ୟ ଦେଇ ଅଶ୍ରୁଳ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ ।