ଓଡ଼ିଶାକୁ ନାହିଁ ସତର୍କ ସୂଚନା: ମୃତ୍ୟୁଞ୍ଜୟ ମହାପାତ୍ର

ଭୁବନେଶ୍ୱର (ବଡ଼ ଖବର ବ୍ୟୁରୋ): ଫନି ବାତ୍ୟାକୁ ୪ ବର୍ଷ ପୂରିଛି । ସେ ବାତ୍ୟାର ତାଣ୍ଡବ ଏଯାଏଁ ମନରୁ ଲିଭିନି । ଠିକ୍ ଏତିକିବେଳେ ପୁଣି ମେ’ ମାସରେ ଆଉ ଏକ ବାତ୍ୟା ଭୟ ସୃଷ୍ଟି ହୋଇଛି । ତେବେ ଆଇଏମଡି ଡିଜି ମୃତ୍ୟୁଞ୍ଜୟ ମହାପାତ୍ର କହିଛନ୍ତି ଓଡ଼ିଶା ପାଇଁ କୌଣସି ସତର୍କ ସୂଚନା ଜାରି କରାଯାଇନାହିଁ । ବାତ୍ୟା କେଉଁଠି ହିଟ୍ କରିବ, ଏହାର ତୀବ୍ରତା କେତେ ରହିବ ଏଯାଏଁ ସ୍ପଷ୍ଟ ହୋଇନି । ଯାହା ମଡେଲରୁ ଜଣାପଡ଼ୁଛି, ୬ ତାରିଖରେ ବଙ୍ଗୋପସାଗରରେ ଏକ ଘୂର୍ଣ୍ଣିବଳୟ ସୃଷ୍ଟିହେବ । ଏହା ୮ ତାରିଖ ସୁଦ୍ଧା ଲଘୁଚାପ ହୋଇ ଅବପାତରେ ପରିଣତ ହେବ । ୯ ତାରିଖରେ ଏହା ବାତ୍ୟାର ରୂପ ନେବ । କିନ୍ତୁ ଏହି ବାତ୍ୟା ସ୍ଥଳଭାଗକୁ ଛୁଇଁବ କି ନାହିଁ, ଏହାର ଗତି କେଉଁ ଆଡ଼କୁ ହେବ, କେଉଁ ଅଞ୍ଚଳରେ ଅଧିକ ପ୍ରଭାବ ରହିବ ତାହା ଦିନେ ଦୁଇଦିନ ପରେ ସ୍ପଷ୍ଟ ହେବ । ୭ ତାରିଖରୁ ମତ୍ସ୍ୟଜୀବୀ ସମୁଦ୍ର ମଧ୍ୟକୁ ନ ଯିବା ଉଚିିତ । କାରଣ ବାତ୍ୟା ପ୍ରଭାବରେ ସମୁଦ୍ର ଅଶାନ୍ତ ରହିବ । ପବନର ବେଗ ବଢିବ । ଅନ୍ୟପକ୍ଷରେ, ବାତ୍ୟାକୁ ସରକାରୀ ସ୍ତରରେ ପ୍ରସ୍ତୁତି ଜୋରଦାର ହୋଇଛି । ଉପକୂଳବର୍ତ୍ତୀ ଜିଲ୍ଲାକୁ ଏସଆରସି ସତର୍କ ସୂଚନା ଜାରି କରିଛନ୍ତି ।