ସହାୟତା ଆଶାରେ ଗୋଲାପ

ସୁକିନ୍ଦା, (ବଡ଼ ଖବର ବ୍ୟୁରୋ): ମୁଣ୍ଡ ଗୁଞ୍ଜିବାକୁ ଭଲ ଘର ଖଣ୍ଡେ ନାହିଁ। ଦିଓଳି ଦି ମୁଠା ଖାଇବାକୁ ବି ମିଳୁନି। ଏମିତି ଏକ ଦୁଃଖଦ ଘଟଣା ଦେଖିବାକୁ ମିଳିଛି ଯାଜପୁର ଜିଲ୍ଲା ସୁକିନ୍ଦା ବ୍ଲକ ସୁକିନ୍ଦାଗଡ଼ ଗାଁରେ । ସ୍ୱାମୀ, ଶଶୁର ଓ ଶାଶୁ ଅଜଣା ରୋଗରେ ଆଗପଛ ହେଇ ୩ବର୍ଷ ମଧ୍ୟରେ ଅରପାରିକୁ ଚାଲିଗଲେ। ଘରେ ୩ ଛୋଟ ଛୁଆଙ୍କୁ ନେଇ ଦୁର୍ଦ୍ଦିନରେ ଦିନ କାଟୁଛନ୍ତି ବିଧବା ଗୋଲାପ। ୪ ପ୍ରାଣୀଙ୍କ ପେଟକୁ ଦାନା ଯୋଗାଇବା ଗୋଲାପଙ୍କ ପାଇଁ କଷ୍ଟ ହୋଇପଡ଼ୁଛି। ଅସୁବିଧାରେ ଚଳୁଥିଲେ ସୁଦ୍ଧା ସରକାରୀ ସହାୟତାରୁ ବଞ୍ଚିତ ହୋଇଛନ୍ତି ଗୋଲାପ। । ଭଙ୍ଗା ଦଦରା ଘରେ ୪ ଜଣ ଚଳିବା କଷ୍ଟକର ହୋଇପଡ଼ୁଛି। ସ୍ୱାମୀଙ୍କ ମୃତ୍ୟୁପରେ ପିଲାଙ୍କୁ ମଣିଷ କରିବା ଲାଗି ଅସୁମାରୀ ସ୍ୱପ୍ନ ଦେଖିଛନ୍ତି ଗୋଲାପ। ପରଘରେ ବାସନ ମାଜି ଯାହା ରୋଜଗାର କରନ୍ତି ସେତିକିରେ ପରିବାର ଚଳିବା କଷ୍ଟକର । ୪ଜଣଙ୍କ ଲାଗି ଦାନା ଯୋଗାଡ଼ କରିବା କେତେ ଯେ କଷ୍ଟ ତାହା ସେ ହିଁ ଜାଣନ୍ତି। ଖୁବଶୀଘ୍ର ତାଙ୍କୁ ସରକାରୀ ସହାୟତା ଯୋଗାଇ ଦେବାକୁ ସୁକିନ୍ଦା ବିଡିଓ ଆମକୁ ପ୍ରତିଶ୍ରୁତି ଦେଇଛନ୍ତି। ତେବେ ଅସହାୟ ପରିବାରକୁ କେବେ ସରକାରୀ ସହାୟତା ମିଳୁଛି ତାହା ଉପରେ ‘ବଡ଼ ଖବର ନଜର’ ରଖିଛି।