ଦେଶୀ ପକ୍ଷୀଙ୍କ ସଂଖ୍ୟା ଭିତରକନିକାରେ ବେଶୀ
ରାଜକନିକା (ବଡ଼ ଖବର ବ୍ୟୁରୋ): ଭିତରକନିକାରେ ବୃଦ୍ଧିପାଇଲା ଦେଶୀୟ ପକ୍ଷୀ ସଂଖ୍ୟା । ଭିତରକନିକା ଜାତୀୟ ଉଦ୍ୟାନରେ ଚଳିତବର୍ଷ ଦେଶୀୟ ପକ୍ଷୀଗଣନା ଶେଷ ହୋଇଛି । ଏହି ଦେଶୀୟ ପକ୍ଷୀଗଣନା ୭ଦିନ ଧରି ଚାଲିଥିଲା । ପକ୍ଷୀ ଗଣନା ପାଇଁ ଦୁଇଟି ଟିମ ଗଠନ ହୋଇଥିଲା । ଚଳିତବର୍ଷ ଭିତରକନିକାରେ ୧ ଲକ୍ଷ ୮ ହଜାର ୬୩୯ଟି ପକ୍ଷୀ ଓ ୨୨ହଜାର ୮୨୮ଟି ବସା ଗଣନା କରାଯାଇଛି ।
ଗତବର୍ଷ ୯୭ ହଜାର ୮୬୬ଟି ପକ୍ଷୀ ଓ ୨୧ହଜାର ୧୮୫ଟି ବସା ଗଣନା କରାଯାଇଥିଲା । ଗତବର୍ଷ ତୁଳନାରେ ଚଳିତବର୍ଷ ୧୦ ହଜାର ୭୭୩ଟି ଦେଶୀୟ ପକ୍ଷୀ ଓ ୧ ହଜାର ୬୪୩ଟି ବସା ଅଧିକ ହୋଇଥିବା ସୂଚନା ମିଳିଛି । ବର୍ଷା ଋତୁର ଆରମ୍ଭରେ ଦେଶର କୋଣ ଅନୁକୋଣରୁ ନିଜର ବଂଶ ବିସ୍ତାର ପାଇଁ ଭିତରକନିକାକୁ ଦେଶୀୟ ପକ୍ଷୀମାନେ ଆସିଥାନ୍ତି ।
ଗେଣ୍ଡାଳିଆ, ରାଣୀବଗ, ମଝିଆବଗ, ଛୋଟ ବଗ, ଖଇରା ବଗ, ମାଟିଆ ବଗ, ଅନ୍ଧାରିଆ ବଗ, ପାଣି କୁଆ, ଦା ବେଣ୍ଟିଆ, କାପରଖାଇ ଭଳି ୧୦ ପ୍ରଜାତିର ପକ୍ଷୀ ଭିତରକନିକାର ମଠ ଆଡିଆ, ଲକ୍ଷ୍ମୀପ୍ରସାଦଡିଆ, ଦୁର୍ଗା ପ୍ରସାଦଡିଆର ଗଛମାନଙ୍କରେ ବସା ବାନ୍ଧିଛନ୍ତି । ଦେଶୀୟ ପକ୍ଷୀମାନଙ୍କୁ ସୁରକ୍ଷା ଦେବାପାଇଁ ବନବିଭାଗ ପକ୍ଷରୁ ସମ୍ପୂର୍ଣ୍ଣ ବ୍ୟବସ୍ଥା କରାଯାଇଥିବା କହିଛନ୍ତି ରାଜନଗର ବନଖଣ୍ଡ ଅଧିକାରୀ ।