ଜଗତସିଂହପୁର (ବଡ଼ ଖବର ବ୍ୟୁରୋ): କିଡନି ରୋଗରେ ପିଡିତ ଧର୍ମେନ୍ଦ୍ର ସ୍ୱାଇଁ । ଚିକିତ୍ସାରେ ଅର୍ଥ ସାଜିଛି ବାଧକ । ପୁଅ ଚିକିତ୍ସା ପାଇଁ ୬୦ବର୍ଷ ବୟସର ବାପା ଚେନାଇ ଯାଇଛି ଏକ ଘରୋଇ କମ୍ପାନୀରେ ଦାଦନ ଖଟିବାକୁ । ଏମିତି ଘଟଣା ଦେଖିବାକୁ ମିଳିଛି ଜଗତସିଂହପୁର ଜିଲ୍ଲା ବାଲିକୁଦା ବ୍ଲକ ଅନ୍ତର୍ଗତ ଅଢ଼ଙ୍ଗା ପଞ୍ଚାୟତ ଦାଆଗାଁରେ । କାହ୍ନୁ ଚରଣ ସ୍ୱାଇଁଙ୍କ ପୁଅ ଧର୍ମେନ୍ଦ୍ର ସ୍ୱାଇଁ କିଡନି ରୋଗରେ ପିଡିତ ହୋଇ ଘରେ ପଡିରହିଛନ୍ତି । ଚିକିତ୍ସା ପାଇଁ ଅର୍ଥର ଆବଶ୍ୟକତା ଥିବାରୁ ଉପଯୁକ୍ତ ଚିକିତ୍ସା କରାଇବାରୁ ବଞ୍ଚିତ ହୋଇଛନ୍ତି ପରିବାର ଲୋକେ । ନିଜର କିଛି ଜମିବାଡି ନଥିବାବେଳେ ଭାଗଚାଷ କରି ଯାହା ରୋଜଗାର କରନ୍ତି ସେହିଥିରେ ଚଳନ୍ତି । ୮ ମାସ ତଳେ ସେ ରୋଗରେ ପଡି କଟକ ବଡ଼ ମେଡିକାଲରେ ଚିକିତ୍ସିତ ହୋଇ ଘରକୁ ଫେରିଥିଲେ ।
ମାତ୍ର ଅସୁସ୍ଥ ହୋଇପଡିବାରୁ ପରିବାର ଲୋକ କରି କିଛି ଟଙ୍କା ଯୋଗାଡ କରି ତାଙ୍କୁ କଟକ ଡାକ୍ତରଖାନାକୁ ପଠାଇଥିଲେ । ପରୀକ୍ଷା କରିବାରୁ ଧର୍ମେନ୍ଦ୍ରଙ୍କ ଦୁଇଟି କିଡ଼ନୀ ଖରାପ ହୋଇଯାଇଥିବା ଜାଣାପଡ଼ିଥିଲା । ଡାକ୍ତର କିଡନି ପ୍ରତିରୋପଣ ପାଇଁ ସାତ ଲକ୍ଷ ଟଙ୍କା ଖର୍ଚ୍ଚ ହେବ ବୋଲି କହିଥିଲେ । ଧର୍ମେନ୍ଦ୍ରଙ୍କ ଚିକତ୍ସା ପାଇଁ ଏତେ ପରିମାଣର ଅର୍ଥର ଆବଶ୍ୟକତା ଥିବାବେଳେ କେଉଁଠୁ ସାହାଯ୍ୟ ପାଇବେ ଓ ପୁଅ ର ଚିକିତ୍ସା କରାଇବେ ସେନେଇ ଚିନ୍ତାରେ ପଡି ଯାଇଛନ୍ତି ଧର୍ମେନ୍ଦ୍ରଙ୍କ ପରିବାର। ଏପରି ଅବସ୍ଥାରେ ଯଦି କେହି ସରକାରୀ କିମ୍ବା ବେସରକାରୀ ସଂସ୍ଥା ତାଙ୍କ ଚିକିତ୍ସା ପାଇଁ ସହଯୋଗର ହାତ ବଢ଼ାନ୍ତେ ତେବେ ଧର୍ମେନ୍ଦ୍ର ଭଲ ହୋଇପାରନ୍ତେ ବୋଲି ଗ୍ରାମବାସୀ ଓ ପରିବାର ଲୋକେ ଆଶା ବାନ୍ଧିଛନ୍ତି ।
