ବିନା ଭକ୍ତରେ ଚାଲିଛି ନବରାତ୍ରୀ ପୂଜା
କଟକ (ବଡ଼ ଖବର ବ୍ୟୁରୋ): ଆସିଛି ପାର୍ବଣ । କରୋନା ସମସ୍ତ କ୍ଷେତ୍ରକୁ ପ୍ରଭାବିତ କରିଥିବା ବେଳେ ପାର୍ବଣର ଖୁସିକୁ ମଧ୍ୟ ଛଡାଇନେଇଛି । ତଥାପି ପରମ୍ପରା ବଜାୟ ରଖିବା ପାଇଁ ସବୁ ସ୍ତରରେ ଚାଲିଛି ଉଦ୍ୟମ ।
ଶକ୍ତିପୀଠଗୁଡିକରେ ଚାଲିଛି ନବରାତ୍ରୀ ପୂଜା । କଟକର ଚଣ୍ଡୀ, ଭଦ୍ରକର କାଳୀ, ବଡମ୍ବାର ଭଟ୍ଟାରିକା, ବାଙ୍କୀର ଚର୍ଚ୍ଚିକା, ଶ୍ରୀମନ୍ଦିରରେ ମା’ ବିମଳା, କାକଟପୁରର ମା’ ମଙ୍ଗଳା, ସମ୍ବଲପୁରର ମା’ ସମଲେଇ, ବାଣପୁରର ଭଗବତୀ ପ୍ରଭୃତି ଶକ୍ତିପୀଠଗୁଡିକରେ ଆଜି ନବରାତ୍ରର ତୃତୀୟ ଦିନ ପୂଜାବିଧି ଅନୁସାରେ ଅନୁଷ୍ଠିତ ହେଉଛି । କରୋନା କଟକଣା ଭିତରେ ଏହି ପୂଜା ସମ୍ପାଦିତ ହେଉଛି । କହିହାକୁ ଗଲେ ବିନା ଭକ୍ତରେ ପାଳିତ ହେଉଛି ନବରାତ୍ରୀ ପୂଜା ।
ହିନ୍ଦୁଧର୍ମ ତଥା ଗାଣିତିକ ହିସାବ ଅନୁଯାୟୀ ଏହି ନବରାତ୍ର ସବୁ ରାତିଠାରୁ ଅଧିକ ପୂଣ୍ୟ । ଆଶ୍ଚର୍ଯ୍ୟ ହେବେ, ଏହି ନବରାତ୍ରରେ ୯ ସଂଖ୍ୟାର ମହତ୍ୱ ଅଲଗା । ଆମର ଦୈନନ୍ଦିନ ଜୀବନରେ ୯ ସଂଖ୍ୟାର ବହୁତ ପ୍ରଭାବ ରହିଛି । ପିଲାଟିଏ ନିଜ ମା’ ଗର୍ଭରେ ରହେ ୯ ମାସ, ଆମର ଦିନଚର୍ଯ୍ୟ ଆରମ୍ଭ ହୁଏ ପ୍ରାୟତଃ ୯ଟାରୁ, ଅଫିସରେ କାମ ସମୟ ମଧ୍ୟ ୯ ଘଣ୍ଟା, ଗ୍ରହ ମଧ୍ୟ ୯ଟି, ରତ୍ନ ମଧ୍ୟରେ ଶ୍ରେଷ୍ଠ ନବରତ୍ନ । ସବୁଠାରୁ ଆଶ୍ଚର୍ଯ୍ୟ ୯ ସଂଖ୍ୟାର ଗୁଣନ, ୯ ଅଙ୍କରେ ୯ର ପ୍ରତି ଗୁଣନ ଫଳ ଯାହାକୁ ମିଶାଇଲେ ବି ୯ ହିଁ ହେବ ।
