ମାଟି ଖୋଳିଲେ ବାହାରୁଛି ଚୁଡା
କେନ୍ଦ୍ରାପଡ଼ା (ବଡ଼ ଖବର ବ୍ୟୁରୋ): ମାଟି ଖୋଳିଲେ ବାହାରୁଛି ଚୁଡା । କିଲେ ନୁହେଁ କି ଦୁଇକିଲୋ ନୁହେଁ ମାଟିତଳୁ ବାହାରୁଛି ବସ୍ତା ବସ୍ତା ଚୁଡା । ପ୍ରାକୃତିକ ବିପର୍ୟ୍ୟୟ ସମୟରେ ବିପଦରେ ଥିବା ଲୋକମାନଙ୍କ ପାଇଁ ଆସିଥିବା ଚୁଡ଼ାକୁ ନ ବାଣ୍ଟି ନଷ୍ଟ କରାଯାଇଥିବାର ବଡ଼ ପ୍ରମାଣ ମିଳିଛି କେନ୍ଦ୍ରାପଡ଼ା ରାଜନଗର ବ୍ଲକ ବାଘମାରୀ ପଞ୍ଚାୟତର ମଞ୍ଜୁଳାପଲ୍ଲୀ ପ୍ରାଥମିକ ବିଦ୍ୟାଳୟ ପରିସରରେ । ବାତ୍ୟା ବିପନ୍ନଙ୍କ ପାଇଁ ଆସିଥିବା ହଜାର ହଜାର ଟଙ୍କାର ଚୁଡାକୁ ଲୋକମାନଙ୍କୁ ଦିଆନଯାଇ ଗାତ ଖୋଳି ପୋତି ଦିଆଯାଇଥିବା ଦେଖିବାକୁ ମିଳିଛି । ଲୁଣିପାଣି ମାଡି ଆସିବାରୁ ଜଳବନ୍ଦୀ ଅବସ୍ଥାରେ ଥିବା ବିପନ୍ନଙ୍କୁ ସ୍ଥାନାନ୍ତର କରି ରଖାଯାଇଥିଲା ।
ବାତ୍ୟା ସମୟରେ ଲୋକମାନଙ୍କୁ ରିଲିଫ ସାମଗ୍ରୀ ଠିକ ଭାବରେ ମିଳିନଥିବା ବେଳେ ଦୁଇମାସ ପରେ ସ୍କୁଲ ହତା ଭିତରେ ଏହି ଚୁଡାକୁ କିଏ କାହିଁକି ପୋତିଲା ତାହା ଏବେ ପ୍ରଶ୍ନ ସୃଷ୍ଟି କରିଛି ? ଅନ୍ୟପଟେ ରାଜନଗର ବ୍ଲକ କଂଗ୍ରେସ ଏନେଇ ରାଜନଗର ବିଡିଓଙ୍କୁ ଏକ ଦାବିପତ୍ର ଦେବା ସହିତ ୭ଦିନ ମଧ୍ୟରେ କାର୍ୟ୍ୟାନୁଷ୍ଠାନ ଗ୍ରହଣ ନକଲେ ରାଜରାସ୍ତାକୁ ଓହ୍ଲାଇବ ବୋଲି ଚେତାବନୀ ଦେଇଛି ।
