ଛତିଶଗଡକୁ ବେଆଇନ ବାଲି ଚାଲାଣ
ପଦ୍ମପୁର(ବଡ଼ ଖବର ବ୍ୟୁରୋ): ପଦ୍ମପୁର ଉପଖଣ୍ତ ସମ୍ବଲପୁରୀ ବାଲିଘାଟରୁ ଧରା ପଡିଲା ୯ ଟି ଟ୍ରାକ୍ଟର । ଗତକାଲି ଦିନ ବାରଟାରୁ ଗୋଟାଏ ଘଣ୍ଟା ମଧ୍ୟରେ ସମ୍ବଲପୁରୀ ବାଲିଘାଟରେ ଜଗଦଲପୁର ପୋଲିସ ପକ୍ଷରୁ ଅତର୍କିତ ଚଢାଉ କରାଯାଇଥିଲା । ସେହି ସମୟରେ ୫ଟି ବାଲି ବୋଝେଇ ଟ୍ରାକ୍ଟର ସମ୍ବଲପୁରୀ ଲହଣ୍ତିପୁର ରାସ୍ତା ମଝିରେ ଧରା ହୋଇଥିଲା । ୪ଟି ଟ୍ରାକ୍ଟର ବାଲିଘାଟରୁ ଧରା ପଡିଥିବା ସୂଚନା ଦେଇଛନ୍ତି ଜଗଦଲପୁର ଆଇଆଇସି ଲିଲିମା ଲଲିତା ବାର୍ଲା ।
ଖବର ପାଇ ପଦ୍ମପୁର ଏସଡିପିଓ ପ୍ରଦୀପ ସାହୁ ଜଗଦଲପୁର ଆଇଆଇସି ଲିଲିମା ଲଲିତା ବାର୍ଲାଙ୍କୁ ବାଲିଘାଟରେ ଚଢାଉ ପାଇଁ ନିର୍ଦ୍ଦେଶ ଦେଇଥିଲେ । ଜଗଦଲପୁର ଆଇଆଇସିଙ୍କ ସହିତ ଏଏସଆଇ ସତ୍ୟାନନ୍ଦ ଭୋଇ, ହାବିଲଦାର ଜିତେନ ଦାସଙ୍କ ସମେତ ଲଖମରା ଆରଆଇ ଦାମୋଦର ସୁନା ଚଢଉରେ ସାମିଲ ହୋଇଥିଲେ । ଗୋଟିଏ ଟ୍ରାକ୍ଟର ଓଡିଶାର ଏବଂ ବାକି ଆଠଟି ଟ୍ରାକ୍ଟର ଛତିଶଗଡ ଅଞ୍ଚଳର । ସମସ୍ତ ଟ୍ରାକ୍ଟର ଜବତ କରାଯାଇ ଜଗଦଲପୁର ଥାନାରେ ଅଟକ ରଖାଯାଇଛି । ଆରଟିଓଙ୍କୁ ଏ ବାବଦରେ ମଧ୍ୟ ସୂଚନା ଦିଆଯାଇଥିଲା ।