ଭୁବନେଶ୍ୱର (ବଡ଼ ଖବର ବ୍ୟୁରୋ): ରାଜ୍ୟର ବିଭିନ୍ନ ସ୍ଥାନରେ ଚାଷୀମାନେ ଆନ୍ଦୋଳନ କରୁଛନ୍ତି । ମଣ୍ଡିରୁ ଧାନ ଉଠୁନି । ବିଧାନସଭାର ଗତ ବଜେଟ୍ ଅଧିବେଶନରେ କୃଷିମନ୍ତ୍ରୀ କହିଥିଲେ ରାଜ୍ୟର ସମସ୍ତ ଚାଷୀଙ୍କଠାରୁ ସରକାର ଧାନ କିଣିବେ । ମନ୍ତ୍ରୀ ବିଧାନସଭାରେ ପ୍ରତିଶ୍ରୁତି ଦେଲେ । ମାତ୍ର ସରକାର ଅଧିକାରୀମାନଙ୍କୁ ନିର୍ଦ୍ଦେଶ ଦେଲେ ନାହିଁ । ଧାନ କିଣା ହେଲାନି । ଚାଷୀମାନେ ସେମାନଙ୍କ ଧାନ ଧରି ରାଜରାସ୍ତା ଅବରୋଧ କରୁଛନ୍ତି ।
କିଛି ଚାଷୀ ଧାନକୁ ଜଗି ମଣ୍ଡିରେ ଦିନରାତି ପଡିରହିଛନ୍ତି । ଯଦି ରାଜ୍ୟ ସରକାର ସମସ୍ତ ଚାଷୀଙ୍କଠାରୁ ଧାନ ନକିଣନ୍ତି ଆତ୍ମହତ୍ୟା କରିବେ ବୋଲି ଦେବଗଡ଼ର ବିଜେପି ବିଧାୟକ ସୁବାସ ପାଣିଗ୍ରାହୀ ଆଜି ବିଧାନସଭାରେ ଧମକ ଦେଇଛନ୍ତି । ବିଧାନସଭା ବଜେଟ ଅଧିବେଶନର ପ୍ରଥମ ପର୍ଯ୍ୟାୟରେ ଚାଷୀଙ୍କ ସମସ୍ୟା ସମ୍ପର୍କରେ ଆଲୋଚନା ହୋଇଥିଲ ।
ଆଲୋଚନାରେ ଭାଗ ନେଇ ଦେବଗଡ଼ ବିଧାୟକ କହିଥିଲେ ରାଜ୍ୟର ସବୁଚାଷୀଙ୍କଠାରୁ ସରକାର ଧାନ ନକିଣିଲେ ସେ ଆତ୍ମହତ୍ୟା କରିବେ । ପରେ ରାଜ୍ୟ ସରକାର ନରମିଥିଲେ । ପ୍ରତିଶ୍ରୁତି ଦେଇଥିଲେ, ବିଧାୟକଙ୍କ ଦାବି ପୂରଣ ହେବ । ମାତ୍ର ସରକାର ଦେଇଥିବା ପ୍ରତିଶ୍ରୁତି ପାଳନ ନ ହେବାରୁ ବିଧାୟକ ପୁଣି ଆତ୍ମାହୂତି ଧମକ ଦେଇଛନ୍ତି ।
