ବନ୍ଧାହେଲେ ୩୦ ଟଙ୍କିଆ ଦାଦା
ଭୁବନେଶ୍ୱର, (ବଡ଼ ଖବର ବ୍ୟୁରୋ): କମିଶନରେଟ୍ ପୋଲିସ ‘ଦାଦା ବଟିକୁ ନା’ଅପରେସନ ଚାଲୁ ରହିଛି । କମିଶନରେଟ୍ ପୋଲିସ ଅଧୀନରେ ଯାଉଥିବା ଅଞ୍ଚଳରୁ ଧରା ହେଉଛନ୍ତି ଦାଦା । ବୁଧବାର ୩୦ ଟଙ୍କା ଦାଦା ବଟି ମାଗି ଗିରଫ ହୋଇଛନ୍ତି ବିବୁନା ରାଉତ । ପୋଲିସ ବିବୁନାଙ୍କୁ ଗିରଫ କରି କୋର୍ଟ ଚାଲାଣ କରିଛି । ମଙ୍ଗଳବାର ରାତିରେ ବାଲିଅନ୍ତା ଥାନା ଅଞ୍ଚଳର ଟ୍ରକ ଡ୍ରାଇଭର ସାଲୁ ପ୍ରଧାନ ଗାଡି ନେଇ ଆସୁଥିଲେ । ମୁଣ୍ଡମୁହାଣ ଛକରେ ବିବୁନା ଟ୍ରକ ଅଟକାଇ ସାଲୁଙ୍କୁ ବଟି ମାଗିଥିଲା । ସାଲୁ ବିବୁନାଙ୍କୁ ୩୦ ଟଙ୍କା ଦେଇ ଘଟଣାସ୍ଥଳରୁ ଚାଲି ଆସିଥିଲେ ।
ବାରଙ୍ଗ ଥାନାରେ ଏନେଇ ଲିଖିତ ଅଭିଯୋଗ କରିଥିଲେ ସାଲୁ । ପୋଲିସ ଏକ ମାମଲା ରୁଜୁ କରିଥିଲା । ବିବୁନା ପ୍ରଥମେ ଫେରାର ହୋଇଯାଇଥିଲା । ପରେ ପୋଲିସ ବିବୁନାଙ୍କୁ ଧରିବାରେ ସଫଳ ହୋଇଛି । ଅନ୍ୟ ଟ୍ରକଠାରୁ ଆଦାୟ କରି ରଖିଥିବା ୫୧୦ ଟଙ୍କା ସହ ଗୋଟିଏ ମୋବାଇଲ ଫୋନ ଜବତ କରିଛି ପୋଲିସ । ବୁଧବାର ବିବୁନାଙ୍କୁ କୋର୍ଟ ଚାଲାଣ କରାଯାଇଛି ।