ବିବାହ କରିବେ କରିବେ ଟ୍ରେଣ୍ଡିଂ ସିଙ୍ଗର କୁଲ୍ଦୀପ୍, ସରିଲା ନିର୍ବନ୍ଧ
ବଡ଼ ଖବର ବ୍ୟୁରୋ: ଓଡିଆ ସଙ୍ଗୀତ ଜଗତର ଟ୍ରେଣ୍ଡିଂ ସିଙ୍ଗର କୁଲଦୀପ ପଟ୍ଟନାୟକ । ନିଜ ଗୀତ ପାଇଁ ସବୁବେଳେ ଚର୍ଚ୍ଚାରେ ରହିଥାନ୍ତି । ଓଡିଆ ଆଲବମ୍ ଦୁନିଆରେ ଏବେ ସେ ଜଣେ ଆଗଧାଡିର ସିଙ୍ଗର । ତାଙ୍କର ପ୍ରତିଟି ଗୀତ ରିଲିଜ୍ ହେବା ମାତ୍ରେ ହିଁ ଶୋସିଆଲ ମିଡିଆରେ ଟ୍ରେଣ୍ଡ୍ କରିଥାଏ । ଆଉ ସବୁଠାରୁ ବେଶି ଯୁବପିଢିଙ୍କ ମୁହରେ ଏହି ଗୀତ ଶୁଣିବାକୁ ମିଳେ । ତେବେ ବର୍ତ୍ତମାନ କୁଲଦୀପ୍ ନିଜ ପର୍ଶନାଲ ଲାଇଫକୁ ନେଇ ଚର୍ଚ୍ଚାରେ ରହିଛନ୍ତି । ଖୁବଶୀଘ୍ର ହାତକୁ ଦି ହାତ ଦେବାକୁ ଯାଉଛନ୍ତି କୁଲଦୀପ୍ । ସଂଗୀତ ଜଗତର ରାଜା କୁଲଦୀପ୍ ଏବେ ମ୍ୟାରେଜ୍ କରିବେ ସଙ୍ଗୀତ ଦୁନିଆର ଜଣେ ରାଣୀଙ୍କୁ । ଭକ୍ତିଭରା ଗୀତରୁ ରୋମାଣ୍ଟିକ୍, ଏମିତିକି ମନ୍ତ୍ରମୁଗ୍ଧକର ଦେଶାତ୍ମକବୋଧକ ସଂଗୀତଯାଏ, ଉଭୟଙ୍କ ସ୍ୱରର ଯାଦୁ କେବଳ ଯୁବପିଢି ନୁହେଁ ବରଂ ସବୁ ବର୍ଗର ଲୋକଙ୍କ ମନ ଜିଣିଛି । ଆଉ ଏବେ ରିୟଲ ଲାଇଫରେ ଦୁହେଁ ଦୁହିଁଙ୍କ ହାତ ଧରିବାକୁ ଯାଉଛନ୍ତି ।
ଖବର ଅନୁସାରେ କୁଲ୍ଦୀପ୍ ପଟ୍ଟନାୟକ ଓ ଈପ୍ସିତା ପଣ୍ଡା ଖୁବ୍ ଶୀଘ୍ର ବିବାହ ବନ୍ଧନରେ ବାନ୍ଧି ହେବାକୁ ଯାଉଛନ୍ତି । ସଙ୍ଗୀତ ଦୁନିଆରେ ଚର୍ଚ୍ଚିିତ ଯୋଡି ପାଲଟିଥିବା ଏହି ଦୁଇ ସିଙ୍ଗର ଏବେ ରିୟଲ ଲାଇଫରେ ଏକାଠି ହେବେ । ନିକଟରେ ସାକ୍ଷୀଗୋପାଳଠାରେ ଉଭୟଙ୍କ ନିର୍ବନ୍ଧ ସରିଛି । ଏବଂ ଆସନ୍ତା ଡିସେମ୍ବରରେ ବିବାହ ହେବ । ତେବେ ଉଭୟଙ୍କ ବିବାହକୁ ନେଇ ସେମାନଙ୍କ ପ୍ରଶଂସକଙ୍କ ମଧ୍ୟରେ ଖୁସିର ମାହୋଲ୍ ଦେଖିବାକୁ ମିଳିଛି । ଶୋସିଆଲ ମିଡିଆରେ ଏବେ ଦୁହିଁଙ୍କୁ ଶୁଭେଚ୍ଛାର ସୁଅ ଛୁଟିଛି ।
ତେବେ ପୂର୍ବରୁ ରାଜଧାନୀ କୁଇନ୍ ନାମକ ଗୀତରେ ଉଭୟଙ୍କ ଯୋଡି ବେଶ୍ ଲୋକପ୍ରିୟତା ହାସଲ କରିଥିଲା । ତା ଛଡା ଦୁହେଁ ଆଲବମ୍ ଦୁନିଆର ଅନେକ ରୋମାଣ୍ଟିକ୍ ଗୀତ ମଧ୍ୟ ଗାଇଛନ୍ତି ଯାହାକୁ ଦର୍ଶକ ବେଶ୍ ପସନ୍ଦ କରିଛନ୍ତି । କହିବାକୁ ଗଲେ ଗତ କିଛି ଦିନ ମଧ୍ୟରେ ଉଭୟ ରୋମାଣ୍ଟିକ୍ ସିଙ୍ଗର ଭାବେ ଆଲବମ୍ ଦୁନିଆରେ ନାଁ କରି ସାରିଲେଣି । ତେବେ ଆଗକୁ ମ୍ୟାରେଜ୍ ପରେ ବି ଦୁହେଁ ସଙ୍ଗୀତ ଦୁନିଆରେ ଧମାଲ୍ କରିବେ ବୋଲି ଆଶା ରଖିଛନ୍ତି ଦର୍ଶକ ।