ପିଡିଏସ ବଣ୍ଟନରେ ଅନିୟମିତତା
ବସ୍ତା, (ବଡ଼ ଖବର ବ୍ୟୁରୋ): ବାଲେଶ୍ୱର ଜିଲ୍ଲା ବସ୍ତା ବ୍ଲକ ପତ୍ରଝଡ଼ା ପଞ୍ଚାୟତ କରଞ୍ଜିଆ ଗ୍ରାମରେ ପିଡିଏସ ସାମଗ୍ରୀ ବଣ୍ଟନରେ ଦେଖାଦେଇଛି ଅନିୟମିତତା। ଏହାର ପ୍ରତିବାଦରେ ଆଜି ବସ୍ତା ବ୍ଲକ କାର୍ୟ୍ୟାଳୟ ସମ୍ମୁଖରେ ବିକ୍ଷୋଭ କରିଛନ୍ତି ହିତାଧିକାରୀ। ସୂଚନା ଅନୁଯାୟୀ, କରଞ୍ଜିଆ ଗ୍ରାମର ଡିଲର ସୈରୁନ ବିବି ହିତାଧିକାରୀଙ୍କୁ ସର୍ବସାଧାରଣ ସ୍ଥାନରେ ସାମଗ୍ରୀ ନ ବାଣ୍ଟି ଜଣେ ବ୍ୟକ୍ତିଙ୍କ ଘରେ ବାଣ୍ଟୁଛନ୍ତି। ଏ ନେଇ ଗ୍ରାମବାସୀମାନଙ୍କ ମଧ୍ୟରେ ଦେଖାଦେଇଛି ଅସନ୍ତୋଷ।
ଗ୍ରାମବାସୀ ବାରମ୍ବାର ଡିଲରଙ୍କୁ ଏ ସମ୍ପର୍କରେ ଅଭିଯୋଗ କଲେ ମଧ୍ୟ ସେ ହିତାଧିକାରୀଙ୍କୁ ଦୁର୍ବ୍ୟବହାର କରୁଥିବା ଅଭିଯୋଗ କରିଛନ୍ତି ଲୋକେ। ଏ ସମ୍ପର୍କରେ ଗ୍ରାମବାସୀ ବସ୍ତା ବିଡିଓ ଏବଂ ଯୋଗାଣ ଅଧିକାରୀଙ୍କୁ ଅବଗତ କରାଇଥିଲେ ମଧ୍ୟ କୌଣସି ପଦକ୍ଷେପ ନିଆ ନ ଯିବାରୁ ଆଜି ବାଧ୍ୟ ହୋଇ ବ୍ଲକ କାର୍ୟ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛନ୍ତି। ଏ ସମ୍ପର୍କରେ ବିଡିଓଙ୍କୁ ଯୋଗାଯୋଗ କରିବାରୁ ଘଟଣାର ତଦନ୍ତ କରାଯାଇ କାର୍ୟ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।